KHUNTO kontinua fó prioridade ba programa saúde-edukasaun-ekonómia
MANATUTO, 22 abríl 2023 (TATOLI)–Prezidente Partidu Kmanek Haburas Unidade Nasionál Timoroan (KHUNTO), Armanda Berta dos Santos, hateten bainhira povu Manatuto fó fiar ba partidu KHUNTO mak sei kontinua fó prioridade ba programa saúde, edukasaun no ekonómia iha Timor-Leste.
Notísia Relevante: Labarik minoridade partisipa kampaña polítika KHUNTO nian iha Manufahi
“Futuru iha joven nia liman, nune’e hakarak ko’alia katak ita sei la sees hosi programa edukasaun, saúde, ekonómia, infraestrutura hanesan estrada, bee-moos, eletresidade no seluk tan. Tanba ne’e, husu Manatuto-oan tenke fó kontribuisaun ba moris di’ak no unidade nasionál,” Armanda Berta hateten iha kampañia KHUNTO ne’ebé realiza iha postu administrativu Natarbora, munisípiu Manatuto, sábadu ne’e.
Tanba, nia dehan, KHUNTO mai ho nia programa rasik hodi kontinua ba iha Governasaun tuir mai, nune’e bele haree ba povu ida nia di’ak iha Timor-Leste.
“Ita manán, ita haree joven sira-ne’ebé eskola, futuru iha imi-nia liman, nune’e bainhira Governu presiza mak ita-boot sira bele konkorre mak bele tama iha ne’ebá. Karik sira-ne’ebé la eskola, ita sei halo rekrutamentu hodi halo servisu ka hamoos dalan ka estrada iha aldeia no suku. Atu dehan, ita-nia emar ba serbisu iha rai-li’ur di’ak, tanbasá mak la halo servisu iha rai-laran,” nia hateten.
Prezidente KHUNTO ne’e hatutan, bainhira KHUNTO manán sei kontinua implementa programa bolsa da mãe jerasaun foun no sei kontinua mós implementa programa Uma Naroman ba Povu (UNP) liuhosi Programa Nasionál Dezenvolvimentu Suku (PNDS).
Konsilleiru Másimu Partidu KHUNTO, José dos Santos Naimori Bucar, hateten dezenvolvimentu presiza kria polítika ida-ne’ebé iha pás no estabilidade, iha povu no nasaun ida-ne’e.
“Polítika ne’e tenke hadomi malu no hanoin ida de’it, nune’e povu bele moris di’ak iha nia rain rasik,” nia hateten.
Notísia Relevante: KHUNTO defende investe iha edukasaun, saúde no setór produtivu
Jornalista : Osória Marques
Editór : Cancio Ximenes
