AINARO, 19 abril 2023 (TATOLI) – Partidu Kmanek Haburas Unidade Nasionál Timor Oan (KHUNTO) promete sei dezenvolve setór edukasaun, saúde, Infraestrutura, sosiál no setór produtivu hodi garante povu nia moris di’ak.
Prezidente partidu KHUNTO, Armanda Berta dos Santos, kompromete bainhira forsa partidária ne’e manán iha eleisaun parlamentár hodi ka’er ukun iha períodu 2023-2028 sei sai tilun no ibun povu nian iha uma fukun Parlamentu Nasionál nune’e bele deside moris di’ak sidadaun sira nian. Líder partidu ne’e husu ba militante no simpatizante hotu vota ba KHUNTO hodi deside povu nia moris di’ak.
Prezidente partidu ne’e rekoñese, maske iha Governu da-walu “la halo buat barak”, maibe ne’e nu’udar prosesu ida iha sistema governasaun.
“Se karik povu fó fiar ba partidu KHUNTO hodi ka’er Governu da-sia, sei halo mudansa lubuk ida ba povu nia moris di’ak, tanba edukasaun, saúde no infraestrutura importante”, Armanda Berta dos Santos afirma iha kampaña aberta ne’ebé hala’o iha kampu futuból Ainaru-Vila, kuarta ne’e.
Partidu KHUNTO kompromete katak sei tau matán ba inan-isin rua, labarik ki’ik, katuas-ferik no ema sira ne’ebé vulnerável liu.
“Sei priorioza mós ba dezenvolvimetu setór turizmu hodi fó retornu ba Estadu, tanba durante ne’e depende de’it ba fundu petrolíferu. Importante tebes investe iha turizmu no dezenvolve ekonomia kriativu hodi tau matan ba joven sira”, nia realsa.
Armanda Berta dos Santos defende katak partidu sei kaer ba prinsípiu filozófia fundamentál partidu nian mak “tane ó rai, ó ema no ó lisan”. Ho prinsípiu hirak ne’e, partidu KHUNTO nia vizaun mak hari’i sosiedade ida ne’ebé livre, justu, akuntável no demokrasia ho abut metin iha fé, esperansa no karidade.
“Vizaun ida ne’e prenxe duni valór independénsia nu’udar país demokrátiku hodi partisipa ho ativu iha dezenvolvimentu nasionál”, nia reafirma.
Jornalista: Afonso do Rosário
Editora: Isaura Lemos de Deus
