CNRT sei hato’o keixa-kondena ema deskoñesidu tuda militante CNRT

DILI, 24 abríl 2023 (TATOLI)—Prezidente Konsellu Diretivu Nasionál hosi Partidu Congresso Nacional da Reconstrução Timorense (CNRT), Dionísio Babo, hateten CNRT sei kondena no hato’o keixa formál ba parte kompetente halo prosesu investigasaun kle’an ba ema deskoñesidu tudan militante CNRT hafoin partisipa kampaña iha Viqueque foin lalais ne’ e.

Notísia Relevante: PNTL Viqueque buka tuir ema deskoñesidu tuda militante CNRT

“CNRT hakarak kondena makaas tebes, aktu ne’ebé hala’o depois liu tiha komisíu iha Viqueque ne’ebé iha Loihunu akontese iha adversáriu balun hosi partidu polítiku balun, ne’ebé tuda no halo asaun violenta to’o rejista membru partidu CNRT balun hetan kane. Iha, kuaze ema na’in-neen (6) mak afetadu maibé ida mak ulun kanek no submete tiha ona ba tratamentu médiku. Ida-ne’e ami halo keixa ona, depois ami sei halo keixa formál no prosesu formál sei hato’o liuhosi partidu, hosi nia ekipa legal hodi bele hetan ka husu ba órgaun kompetente halo investigasaun kle’an kona-ba kazu ida-ne’e,” Prezidente KDN hosi partidu CNRT ne’e hato’o liu-hosi konferénsia imprensa ba jornalista sira iha sede partidu CNRT, Bairru dos Grillos, segunda ne’e.

Nia mós husu órgaun eleitór hodi rejista didi’ak kazu violentu sira-ne’e, se bele fó sansaun ida forte ba partidu ne’ebé nia adversáriu la respeita prosesu demokrásia iha Timor-Leste no la hatudu asaun edukativu hodi eduka nia militante sira.

Partidu CNRT hato’o solidariedade ba família vítima sira-nian, no husu pás no estabilidade mantein nafatin hodi kampaña eleitorál ne’e bele la’o to’o nia rohan.

Prezidente Konsellu Diretivu Nasionál ne’e hateten, kampaña partidu CNRT nian hala’o ba loron datoluk iha loron horisehik iha munisípiu Baucau la’o ho di’ak tebes, ne’ebé militante no simpatizante ho movimentu sira rejista partisipasaun ida pozitivu.

Maibé, tnia dehan, partidu iha informasaun prelimináriu katak iha atentadu atu halo violénsia durante militante CNRT fila ba parte leste no Vemasse, maibé aktu sira-ne’e sei iha hela investigasaun.

“Maibé CNRT kondena tebes aktu tentativa sira-ne’e, no hanesan halo beibeik ona iha komisíu sira lakohi atu responde ka uza aktu hanesan, hodi bele estraga fali ita-nia festa demokrásia ne’ebé timoroan hotu-hotu agora hakarak atu halo mudansa ba ita-nia rain liu-hosi eleisaun ida ne’e,” nia hateten.

Mezmu nune’e, Dionísio Babo, hato’o pontu situasaun jerál kampaña eleitorál hosi partidu CNRT nian iha munisípiu tolu hanesan iha Manatuto, Viqueque, Baucau, partidu hakarak hato’o nia fesilitasaun no parabéns ba ámbitu demokrásia ne’ebé akontese iha Viqueque ho partisipasaun kuadru no militante ka simpatizamentu sira hotu.

“Kampaña dalahuku CNRT nian iha munisípiu Manatuto, la’o ho di’ak ho ema hotu liu-liu kuadru, simpatizante hosi postu administrativu hotu inklui iha dia seguinte halo iha Laleia hetan resposta di’ak tebes, husu militante no rejista laiha akontesimentu espesífiku depois kampaña komísiu. Tanba ne’e partidu CNRT hakarak louva no agradese, felisita partisipasaun hotu-hotu nian, militante ho simpatizante inklui partidu sira seluk ne’ebé kria ona situasaun pás no kalma,” nia dehan.

Notísia Relevante: Partidu CNRT apela timoroan mantein pás no estabilidade

Jornalistfa : Nelson de Sousa

Editór         : Cancio Ximenes