DILI, 24 abríl 2023 (TATOLI)—Vise Prezidente Parlamentu Nasionál (PN) no atuál Deputada hosi bankada PLP, Maria Angelina Sarmento, hateten prosesu perde mandatu ba Deputadu Cornelio Gama ‘L7’ daudaun ne’e iha hela prosesu nia laran.
Notísia Relevante: PLP prepara karta perde mandatu ba Deputadu L7
“Ida-ne’e iha prosesu nia laran. Hau seidauk informa iha ne’e kona-ba nia lala’ok sira maibé ne’e tenke akontese tanba Deputadu ida mai tuúr iha ne’e (PN) isin lolon reprezenta PLP maibé ulun halai ba partidu seluk. Ida-ne’e labele no fara mais nia reprezenta hanesan xefe bankada partidu PLP,” Maria Angelina Sarmento hateten ba jornalista sira iha PN, segunda ne’e.
Nia hatutan, ida ne’e étika polítika ladi’ak, tan ne’e prosesu ne’e daudaun sei la’o hela no sei hala’o iha perde mandatu iha tempu badak, tanba daudaun ne’e mós iha períodu kampaña eleitorál hela no hafoin ne’e mak sei realiza.
Notísia Relevante: PLP deside hapara Deputadu L7 hosi Xefe Bankada
Jornalista : Nelson de Sousa
Editór : Cancio Ximenes
