DILI, 24 abríl 2023 (TATOLI)—Vise Prezidente Parlamentu Nasionál (PN), Maria Angelina Sarmento, informa prosesu perde mandatu ba Deputadu CNRT na’in-16 hein Prezidente Parlamentu Nasionál mak deside tau ajenda lori ba iha plenária.
Notísia Relavante: PN notifika Deputadu CNRT na’in-16 ameasa lakon mandatu
“Ida-ne’e ha’u hanoin ita-boot sira konfirma to’ok iha meza, tanba prosesu hotu ami la’o ona, agora Prezidente Parlamentu Nasionál mak deside óinsá atu prosesa,” Vise Prezidente PN ne’e hateten ba jornalista sira iha uma fukun PN, segunda ne’e.
Nia hatutan, prosesu ida notifikasaun no ko’alia ka rona Deputadu sira-ne’e la’o hotu ona, agora lori mai ajenda mak presiza desizaun hosi Prezidente Parlamentu Nasionál, Aniceto Longuinhos, nune’e bainhira iha ajenda lori ba plenária hodi prosesu perde mandatu ka lakon mandatu ba Deputadu CNRT na’in-16 hodi plenária delibera, no ba iha prosesu ne’e Deputadu CNRT la aseita bele halo rekursu ba Tribunál.
Notísia Relavante: CNRT entrega karta justifikasaun ba meza PN
Jornalista : Nelson de Sousa
Editór : Cancio Ximenes
