MAP no JICA fahe koñesimentu ba ofisiál kona-ba hasa’e produsaun hare
DILI, 25 abríl 2023 (TATOLI)—Ministériu Agrikultura no Peska (MAP) hamutuk ho Japan International Cooperation Agency (JICA) iha Timor-Leste, tersa ne’e, realiza workshop hodi konvida ofisiál irrigasaun sira hosi munisípiu hodi fahe koñesimentu utiliza bee ho di’ak hodi hasa’e produsaun hare.
Konsultór Tékniku irrigaun JICA, Kazufumi Taira, hateten, objetivu atividade atu fahe koñesimentu kona-ba atividade sira ne’ebé durante ne’e implementa.
“Ohin ami fahe filafali esperiénsia no atividade sira ne’ebé durante ne’e implementa iha eskema irrigasaun iha Maliana I no Buluto liuhosi konvida ofisiál irrigasaun sira hosi munisípiu haat inklui Rejiaun Administrativa Espesiál Oé-cusse Ambeno (RAEOA), oinsá sira bele hatene utiliza bee ho di’ak hodi has’e produsaun hare iha idaidaik nia munisípiu,” Konsultór informa ba Agência Tatoli iha salaun MAP, Comoro.
Iha Maliana I no Buluto sira introdús jestaun partisipatóriu irrigasaun atu ajuda agrikultór utiliza bee no halo jestaun di’ak ba irrigasaun nune’e bee bele fahe di’ak ba agrikultór sira.
Notísia relevante : Governu presiza konstrui banku água reforsa irrigasaun Maliana II
Iha fatin hanesan, Diretór Nasionál irrigasaun, Martinho Laurentino Soares, konsidera, atividade ne’e importante tanba iha relasaun ho komponente rua hosi projetu JICA ne’ebé fó apoiu ba MAP atu hasa’e produsaun hare iha irrigasaun Maliana I iha Bobonaro no Buluto iha Manatuto no postu Vemase, munisípiu Baucau.
Projetu ne’e planu ba tinan-lima, hahú tinan 2016 to’o 2021, enkuantu JICA rasik estende tan ba tinan-rua tanba atividade iha munisípiu rua, liuliu irrigasaun ne’e presiza hadi’a liután kultivasaun produtu liuliu hare, hadi’a bee, produsaun hare no asesu ba merkadu.
“Apoiu sira ne’e ramata iha tinan ida-ne’e tanba projetu kompleta ona tinan-hitu fulan-tolu. Ho ida ne’e, JICA iha inisiativa halo planu hodi konvida fali munisípiu seluk ne’ebé laiha relasaun ho implementasaun projetu rua ne’e hodi mai partisipa workshop tanba hakarak ba oin projetu ne’ebé JICA fó apoiu ne’e bele ramata maibé hakarak munisípiu seluk bele apreende koñesimentu ruma hosi munisípiu Bobonaro no Manatuto,” Martinho Laurentino Soares akresenta.
Diretór dehan, JICA hanorin iha fatin rua kona-ba hadi’a agrikultór sira-nia produsaun hodi bele asesu ba merkadu no munisípiu seluk mós bele apreende saida mak parseiru husik hela iha munisípiu rua nune’e idaidak filafali ba munisípiu bele implementa tuir hodi has’e produsaun hare iha rai-laran.
Nune’e, munisípiu Covalima, Lautém, Manufahi no Viqueque inklui RAEOA ohin partisipa iha workshop.
Nia kompara, molok implementa programa eskema irrigasaun ho agora ne’e iha mudansa boot tanba produsaun hare sa’e tanba antes ne’e natar ektare ida hetan tonelada ida ho balun maibé agora sa’e ba toneleda neen no liu kada ektare.
Benefisiáriu hosi munisípiu rua ne’ebé asesu ba eskema irrigasaun ne’e iha Maliana agrikultór besik 1.000 no grupu agrikultór 500 resin hosi parte Baucau, enkuantu Manatuto agrikultór 400 resin mak sai benefisiáriu hosi programa ne’e.
Iha Manatuto no Vemasse natar ektare 780 mak asesu ba irrigasaun Buluto enkuantu iha Maliana natar ektare 1.000 mak asesu ba irrigasaun Maliana I.
Projetu fíziku hanesan hadi’a irrigasaun Maliana I ho orsamentu milliaun $6 no Muluto ne’ebé halo iha tinan 2017 ho orsamentu $13.000.
Jornalista : Arminda Fonseca
Editora : Julia Chatarina
