BOBONARO, 27 janeiru 2023 (TATOLI)-Diretór servisu agrikultura munisípiu Bobonaro, Alberto Gomes Lopez, hateten governu presiza konstrui ‘banku de água’ nune’e reforsa kanalizasaun bee hosi irrigasaun II bainhira akontese débitu bee menus iha tempu bailoron naruk.
Tuir Alberto, problema ba agrikultór sira iha postu administrativu Maliana, liuliu suku Tapo-Memo no Saburai ne’ebé durante ne’e enfrenta la’ós kondisaun irrigasaun, maibé tanba laiha banku água, nune’e bainhira iha bailoron naruk débitu bee menus no la sufisiente atu fornese ba natar no toos, liuliu ba agrikultórr sira pertense irrigasaun Maliana II ne’ebé dependénsia liu ba udan-been.
Notísia relevante: MAP ke’e ona kanál irrigasaun tradisionál iha Tapo-Memo
“Bainhira planu ordenamentu territóriu ne’ebé maka ita-nia peritu lubuk ida mai, hau sujere pelumenus atu ajuda tán irrigasaun Maliana II. Ne’e ita tenke halo baxia bee ne’e boot ida, Maliana I mós hanesan, ne’e bele utiliza hotu poténsia ne’ebé maka iha,” nia hateten iha Armazein Sentru Lojístika Nasionál (CLN, sigla portugés), Maliana sesta ne’e.
Nia dehan, bainhira governu la koñese kontrui baxia bee ne’e, tinan-tina bele gasta ona ba konstrui no halo normalizasaun ba irrigasaun mós labele halo buat ida tanba volume bee la sufisiente.
Entaun kontinua afeta natar kuaze ekatre 7000, liuliu iha irrigasaun Maliana II balun tenke abandona, tanba fatór determinante atu hasa’e produsaun primeiru mak bee tenke nakonu iha natar laran.
“Ami tékniku nia haree, kuandu ida-ne’e ita realiza duni, ami garante katak ita-nia produsaun sei aumenta tanba bee iha entaun agrikultórr sira mós badinas ona halo natar, tanba ita halo natar presiza bee, se bee laiha pasiénsia agrikultór sira husik ona,” nia dehan.
Bainhira baxia refere estabelese ona bele garante no respondd ba programa governu nian hanesan merenda eskolár inklui planu fó subsídiu alimentár ba funsionáriu públiku sira.
Nia fó-sai katak, daudaun ne’e Ministériu Agrikultura no Peska (MAP) liuhosi diresaun nasionál irrigasaun halo hela normalizasaun ba kanál irrigasaun Mabil-Gol ne’ebé nia rekursu bee mai hosi irrigasaun Maliana II hodi fasilita agrikultór sira halai natar époka dahuluk tinan 2023.
Tuir dadus hosi Ministériu Agrikultura no Peska (MAP) naran iha postu administrativu Maliana iha ektare 7,662. Hosi númeru ne’e iha tinan 2022 área kultiva 5,544 mak ativu ho nia rezultadu produsaun kada ektare tonelada haat.
Tinan ne’e rezultadu produsaun hosi agrikultor Maliana konsege hetan foos tonelada 21. Enkuantu dadus kona-bá Natar Maliana mós iha 27,477 (lahan kering) ho nia produsaun 1,8 kada tonelada.
Notísia relevante: Irrigasaun Maliana II presiza normaliza
Jornalista: Sérgio da Cruz
Editór: Evaristo Soares Martins
