MAPKomS inaugura sentru informasaun Naroman ba Suku ho pontu prinsipál haat iha Oésilo

OÉ-CUSSE 24 abríl 2023 (TATOLI) – Ministériu ba Asuntu Parlamentár no Komunikasaun Sosiál (MAPKomS) segunda ne’e, inaugura sentru informasaun Naroman ba Suku ba suku Malelat no Bobometo, ho pontu prinsipál haat iha sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).

Notísia relevante: MAPKomS prodús profile suku iha RAEOA atu implementa Programa Naroman ba Suku

Ministru ba Asuntu Parlamentár no Komunikasaun Sosiál, Francisco Jerónimo, informa, objetivu hosi programa Naroman ba Suku iha pontu prinsipál haat prioridade ba komunidade iha área rurál asesu ba dezenvolvimentu nasionál.

Pontu dahuluk, promove suku rurál sira no hakbiit komunidade sira hodi asesu ba informasaun. Pontu daruak, informa ba komunidade kona-bá programa VIII Governu Konstitusionál nian no rona komunidade sira-nia preokupasaun kona-bá dezenvolvimentu no transmite ba ministériu relevante.

Pontu datoluk, hasa’e komunidade sira+nia koñesimentu kona-bá dalan no prosesu halo planu dezenvolvimentu, inklui iha nivél suku no prosesu implementasaun planu dezenvolvimentu no dalan ba povu nia partisipasaun no kontrolu.

Pontu ikusliu maka, hasa’e no haluan povo  nia partisipasaun ativu iha dezenvolvimentu nia prosesu tomak no goza ho di’ak hosi dezenvolvimentu.

“Programa ne’ebé MAPKomS halo tanba importante ida de’it, katak dezenvolvimentu atu la’o ho di’ak povu mak tenke sai sentru ba dezenvolvimentu nasionál, povu mak tenke sai sentru ba buat hotu-hotu, labele husik populasaun iha li’ur iha sentru dezenvolvimentu ne’e rasik,” Ministru Francisco Jerónimo ko’alia iha ámbitu serimónia lansamentu ne’ebé realiza iha suku Bobometo, Oé-Cusse.

Entaun MAPKomS ne’ebé mai ho nia hanoin ida, katak, halo oinsya sub-programa Naroman ba Suku, hahú primeiru ministériu konsulta ho komunidade sira iha suku idak-idak, liu-liu suku sira-ne’ebé maka izoladu no susar tebes atu asesu informasaun.

Tan ne’e, prezensa Governu iha suku atu halo diálogu ho komunidade atu fó hanoin ba, katak komunidade iha suku ne’e, tenke hetan informasaun ne’ebé loos, kredivél no kualidade no fiar katak informasaun ne’ebé fó-sai tenke iha fiar ba ema hotu, tanba dala barak sidadaun balu mai hato’o informasaun laloos iha suku sira-ne’ebé konsidera izoladu, hanesan akontesimentu iha situasaun pandemia COVID-19.

“Entaun sub-programa Naroman ba Suku atividade ne’ebé mai atu harii sentru informasaun atu promove no fó hanoin ba joven, sira rasik mak sai na’in ba sentru ne’e hodi hato’o informasaun loloos ba inan-aman sira iha baze, sira mak kaer no buka rasik informasaun no sira sei promove suku ne’e sai hosi izolamentu, tanba objetivu finál maka ne’e, suku labele sai izoladu, nia tenke sai hosi izolamentu, katak saida de’it maka iha suku laran tenke fó-sai ba publiku,” nia informa.

Tuir nia, sé suku ida iha produtu lokál barak, entaun sentru informasaun ne’ebé estabelese ona iha suku, sei fó-sai ba publiku atu hatene, nune’e bele influénsia publiku hodi hakbesik ba suku, tanba hetan ona informasaun liuhosi sentru formasaun ne’e rasik.

“Tan ne’e objetivu hosi sentru formasaun ne’e, atu promove dezenvolvimentu komunidade atu sai hosi izolamentu, tanba materiál sira-ne’ebé Governu oferese maioria dijitál, sira bele asesu ba fatin hotu-hotu no fó informasaun loloos ba publiku,” nia tenik.

Notísia relevante: Programa ‘Naroman ba Suku’ atu promove koñesimentu komunidade ba asaun governativa

Iha biban ne’e, Adjunta Prezidente Autoridade RAEOA, Leonia da Costa Monteiro, reprezenta Autoridade RAEOA agradese ba VIII Governu Konstitusionál, tanba liuhosi programa Naroman ba Suku bele hakbesik dezenvolvimentu ba suku liuhosi informasaun.

“ita agradese ba programa ida mai hosi VIII Governu Konstitusionál, Naroman Suku la’o haleu Timor-Leste inklui RAEOA, tán ne’e ohin komunidade hamutuk autoridade suku no lia-na’in, estudante ohin ita halo inaugurasaun ba sede simples ne’e, maibé iha nia signifikante tebes tanba sentru formasaun sei hatutan programa Governu liuhosi sentru ne’e,” autoridade ne’e orgullu.

Xefe suku Bobometo. Yosep Elo, kompromete sei uza fasilidade ne’ebé iha sentru informasaun ne’e bazea interese publiku hodi kontribui ba prosesu dezenvolvimentu iha suku.

“Ha’u agradese tanba programa ne’e mai atu fasilita joven sira-ne’ebé seidauk hetan serbisu, tán ne’e ita espera ekipamentu ne’ebé Governu fó mai iha suku sei uza ho kuidadu no uza tuir nesesidade,” nia katak.

Purtantu, iha sentru informasaun ne’e, MAPKomS oferese ekipamentu sira hanesan, desktop no laptop inklui memoria card rua, triput ida, externál, televizaun unidade ida, mobiliáriu meja no kadeira no seluk tán.

Entretantu, benefisiáriu ba Programa Naroman ba Suku iha Rejiaun Oé-Cusse, mai hosi sub-rejiaun tolu, iha sub-rejiaun Oésilo implementa iha suku Bobometo, iha sub-rejiaun Pássabe implementa iha  suku Malelat, no iha sub-rejiaun Nítibe implementa iha suku Bene-Ufe.

Notísia relevante: MAPKomS lansa programa ‘Naroman ba Suku’ iha Oésilo

Jornalista: Abílio Elo Nini

Editór: Evaristo Soares Martins