CNE rejista PR-MLPM kansela kamapaña iha Manatuto

MANATUTO, 27 abríl 2023 (TATOLI)—Diretór Komisaun Nasionál Eleisaun (CNE), Munisípiu Manatuto, Paulino Soares, hateten durante CNE observa no halo monitorizasaun iha períodu kampañia, CNE rejistu Partidu Republikanu (PR) no Partidu Movimentu Libertasaun Povu Maubere (MLPM) tanba laiha koñesimentu bainhira kansela kampañia.

Notísia Relevante: Partidu Republikanu altera kalendáriu vizita Soibada ba fulan-maiu

“Kampaña partidu polítika nian ne’ebé realiza iha Manatuto durante loron sia hahú 19-27 abríl, ami ajusta partidu rua iha relatóriu tanba laiha koñesimentu bainhira kansela ka altera kalendáriu kampaña eleitorál,” nia hateten ba Agência Tatoli liuhosi telefónika, kinta ne’e.

Diretór CNE Manatuto hatutan, partidu polítiku sira halo kampaña iha Manatuto ne’e sira hatama hotu ona kalendáriu iha CNE no hetan aprovasaun, maibé bainhira halo kanselamentu mak loron lima antes tenke hato’o karta ba CNE.

“Ida-ne’e mak regra bainhira halo kampaña. Ha’u haree partidu seluk laiha no kumpre duni kalendáriu kampañia nian maibé Partidu Unidade Dezenvolvimentu Demokrátiku ne’e mós kontra regra oras nian no liu tiha oras rua mak sira foin fó hatene ha’u, maibé ne’e sei di’ak tanba kampaña realiza duni tuir loron ne’ebé determina,” nia hateten.

Ida-ne’e hanesan fallansu tékniku ida maibé ba oin hein katak partidu sira labele viola regra ne’ebé fó sai ona no tenke tuir oras no loron ne’ebé termina ona.

Notísia Relevante: CNE Manatuto preokupa partidu MLPM kansela kampaña la fó koñesimentu

Jornalista : Osória Marques

Editór       : Cancio Ximenes