MANUFAHI, 27 abríl 2023 (TATOLI) – Eletrisidade Timor-Leste, Empreza Públika (EDTL,EP) hamutuk ho autoriedade Munisípiu Manufahi inagura ba eletrisidade iha Suku Rotuto no komunidade sira simu ona naroman maske dezde ukun-an la hetan naroman.
Liña eletrisidade ne’ebé inagura, kuaze kilometru 20-resin, hosi Same Vila ba Suku Rotuto, iha ne’ebé komunidade hamutuk ho ekipa EDTL munisípiu mak dada no la liuhosi konkursu.
Iha okaziaun ne’e, Prezidente EDTL, EP Paulo da Silva, hateten servisu ne’e realiza tanba kompromete entre ekipa EDTL munisípiu no populasaun iha Suku Rotuto.
“Ohin ita inagura liña eletrisidade iha suku ida ne’e, ida ne’e tanba komitmentu entre EDTL munisípiu no populasaun sira iha suku ne’e inklui populasaun sira balu hosi Suku Letefoho sorin balun, tanba suku rua ne’e besik malu, ho imi-nia servisu makas mak ohin loron ahi naroman ona iha fatin ida ne’e”, Prezidente dehan bainhira inagura liña eletrisidade iha Rotuto, ohin.
Nia esplika, durante fulan neen-resin, komunidade sira servisu ho voluntáriu, lakon sira nia ai-horis sira, la iha indeminizasaun no komunidade sira kumpre to’o ohin loron realiza kontente ne’ebé povu hotu sente.
“Lori EDTL nia-naran apresia ba kolaborasaun komunidade sira hotu nian, ohin loron ita bele realiza buat saida mak ita hakarak, durante ne’e loke konkursu maibé laiha kompaña ida atu ba aplika, maibé transforma Diresaun EDTL ba EDTL, EP mak muda lei balu fó biban ba EDTL bele servisu hamutuk ho komunidade sira hodi dada liña eletrisidade iha teritóriu laran tomak inklui Rotuto”, nia relata.
Iha okaziaun ne’e, Administradór Munisípiu Manufahi, Arantes Isaac Sarmento, hateten povu merese atu hetan duni naroman no agadese ba Xefe Governu ne’ebé lidera hosi Taur Matan Ruak.
“Agradese ba Governu ne’ebé lidera hosi Primeiru-Ministru Taur Matan Ruak tanba ho nia lideransa konsege rezolve problema eletrisidade liuliu iha Manufahi, povu ne’e agora daudaun merese duni atu hetan naroman liuhosi ahi ida ne’e, maibé ohin tama duni iha suku ida ne’e, ita-boot sira nia kontribuisaun ne’ebé halo seidauk to’o iha ne’e, utiliza ahi karik ho kuidadu rai loron bele hamate tia kalan foin mak bele halo naroman fali, kuidadu didiak eletrisidade ne’ebé mak iha ona”, Arantes dehan.
Nia informa, tuir dadus ne’ebé iha, Manufahi Suku hamutuk 29, hosi númeru ne’e Suku 20 mak asesu ona ba eletrifikasaun no Suku sia mak iha prosesu nia-laran no garante iha tinan ne’e nia laran eletrisidade kobre hotu ona Manufahi.
Iha biban ne’e, Xefe Suku Rotuto José dos Santos agradese ba Governu tanba laran luak konsege dada ona eletrisidade ba nia suku tanba durante tinan 23 ona suku ne’e la asesu ba eletrisidade.
“Agradese tebes ba Governu ida ne’e, durante ne’e ami sente nakukun tebes maibé ohin loron eletrisidade tama ona ami-nia suku ami sente ne’e naroman foun ida mai ami iha tinan 2023 ida ne’e, agradese tebes ba EDTL nasionál no munisípiu no tékniku sira ne’ebé dedika aan makas hamutuk ho ha’u nia komunidade sira servisu voluntáriu ohin ami nia ahi lakan ona”, Xefe Suku revela.
Suku Rotuto kompostu hosi aldeia lima mak hanesan, Sabou, Hatuhei, Foehei, Leofat no Berteni ho nia populasaun hamutuk ema na’in-2095.
Jornalista: Hortencio Sanchez
Editór : Zezito Silva
