Lista ofisiál eleitorál sei hein desizaun STAE nasionál
MALIANA, 28 Abril 2023 (TATOLI)-Diretór Sekretariadu Tékniku Administrasaun Eleitorál (STAE), munisípiu Bobonaro, Mariano Viegas Amarál, informa publikasaun lista ofisiál eleitorál sei hein desizaun hosi diresaun jerál nasionál.
Mariano Viegas esplika, ekipa brigada STAE kolokadu iha postu administrativu neen simu ona dokumentu hosi konkorrente na’in-2,899, maibé presiza de’it ema na’in-1,700 atu serbisu nu’udar ofisiál eleitorál ne’ebé kada estasaun votu sei koloka ema na’in-10.
Notísia relevante: STAE Bobonaro selesiona hela konkorrente ofisiál eleitorál 2,899
“Agora daudaun prosesu selesaun la’o hela, seidauk remata, karik remata mós ita sei hein desizaun hosi diresaun jerál STAE nian, iha ona orientasaun dehan taka ona avizu, mak ita foin taka avizu ba ofisiál eleitorál nian,” Mariano informa ba Jornalista sira, Maliana, sesta ne’e.
Enkauntu prosesu rekrutamentu ne’e tuir regra no rekizitu sira-ne’ebé taka ona ba publiku, tanba ne’e diretór Mariano dehan, informasaun balu dehan ema ho nível primáriu no pre-sekundariu mós liu ne’e laloos.
Banhira kandidatu hirak-ne’e selesionadu, hahú iha loron (03/05) to’o loron (07/05) ne’e sei tuir formasaun konabá prenximentu akta, lei no regra eleisaun nian, nune’e idak-idak bele ezerse papél no funsaun iha sentru votasaun ho di’ak.
Notísia relevante: STAE Bobonaro hahú rekruta ofisiál eleitorál 1.700
Jornalista: Sérgio da Cruz
Editór: Evaristo Soares Martins
