PDHJ Maliana husu partidu polítiku sira hato’o de’it programa ba Povu
MALIANA, 28 abríl 2023 (TATOLI)-Diretór Provedoria Direitu Umanu no Justisa (PDHJ, sigla portugés), Delegasaun Territoriál Maliana, Domingos Pinto Tavares, husu partidu polítiku 17 ne’ebé konkorre iha eleisaun atu hato’o de’it programa prioridade ba povu nune’e povu bele intende programa refere hafoin eskolla iha loron eleisaun.
Notisia relevante: PDHJ Maliana sei kontrola funsionáriu públiku abandona servisu iha kampaña eleitorál
“La’ós ba FRETILIN de’it, la’ós ba CNRT de’it ba partidu 17 ne’ebé mak konkorre iha eleisaun parlamentár, balu mai halo kampaña ona iha munisípiu Bobonaro, balu seidauk, ne’ebé husu ba sira-ne’ebé seidauk, mai karik hato’o de’it programa, hamenus ona buat ida trata malu, hamenus ona buat ida sura kolen, hamenus ona hatún malu,” nia informa ba Jornalista sira, iha Soso, Maliana, sesta ne’e.
Tuir nia, la tempu ona povu atu rona trata no insulta malu, tanba povu presiza liu mak programa, estratéjia, objetivu no meiu sira atu reszolve problema ne’ebé enfrenta durante ne’e, liuliu bee-moos, estrada no elétrika.
Diretór ne’e hateten, bainhira líder polítiku hosi partidu boot sira, trata malu, hatún ida iha palk eleitorál, ne’e hatudu ezemplu ladi’ak ba povu, liuliu jerasaun foun atu banati tuir.
Nia fó hanoin ba partidu polítiku sira ko’alia de’it kona-bá programa ba dezenvolvimentu, tanba daudaun ne’e munisípiu Bobonaro rai monu iha fatin-fatin, bee laiha, saúde la’o ladún di’ak, no komunidade sira preokupa liu sasán nia folin sa’e maka’as iha merkadu.
“Sira mai atu rona ida-ne’e nune’e ita-boot sira-nia programa ne’e konvense sira, dehan partidu ida-ne’e mak di’ak, ha’u-nia votu sei fó ba sira, nune’e tinan 2023-2028, imi bele kaer ukun ho di’ak, dignu no lori esperansa ba povu nia moris di’ak,” nia fó hanoin.
PDHJ mós monitoriza kampaña komísiu no mini-kampaña hosi Partidu Demokrátiku (PD), Partidu Libertasaun Popular (PLP), Partidu Libertasaun Povu Ai Leba (PLA) no partidu seluk tán.
Durante observasaun no monitórizasaun identifika kuadru partidu polítiku FRETILIN no CNRT hadau malu apoiante iha suku Lahomea.
Nune’e mós iha loron rua liubá, deskoñesidu hatún bandeira Partidu Demokratiku ho CNRT iha aldeia Builico, suku Balibo Vila, maibé Komisaun Nasionál Eleisaun (CNE, sigla portugés) konsege rezolve.
PDHJ mós envolve ona iha ekipa Task-Force ne’ebé estabelese hosi autoridade munisípiu Bobonaro atu tau matan no pasa-revista ba patrimóniu estadu.
Tuir oráriu, iha loron-domingu, 29 abríl partidu Frente Revolusionária Nasionál Timor-Leste Independente (FRETILIN) hala’o kampaña ho tipu komísiu iha kampu futeból Maliana no Partidu Kongresu Nasionál Rekonstrusaun Timorense (CNRT) hala’o mini-kampaña iha kampu futeból, suku Tapo-Memo.
Notísia relevante: Menus kombustível difikulta PDHJ Maliana fiskaliza distribuisaun cesta bázika
Jornalista: Sérgio da Cruz
Editór: Evaristo Soares Martins
