Os Verdes de Timor promete hadi’a estrada iha Bobonaro ba to’o aldeia
MALIANA, 30 abríl 2023 (TATOLI)-Partidu Os Verdes de Timor (PVT) ho númeru sorteiru (6), domingu ne’e hala’o kampaña eleitorál ho tipu komísiu iha kampu futeból Maliana Villa, munisípiu Bobonaro, promete hadi’a estrada tama to’o aldeia.
Prezidente Os Verdes de Timor, António Lala-Huno, hateten bainhira povu fó konfiansa iha eleisaun parlamentár 21 maiu 2023, mak sei tau prioridade atu hadi’a estrada sira iha munisípiu Bobonaro ba to’o aldeia sira-ne’ebé tinan 20-resin ona governu seidauk tau prioridade.
Kompromisu polítiku ne’e Lala Huno hato’o ho fiar-aan tanba antes ne’e hanesan jestór ida-ne’ebé kontribui oituan ba projetu estrada nasionál sira hosi Dili ba Baucau no Dili mai fronteira Mota-Ain.
Nia dehan, momentu ne’ebá hanesan jestór deit tanbá ne’e laiha podér polítiku ida atu uza nia kompeténsia hodi hadi’a estrada sira-ne’ebé aat iha munisípiu Bobonaro.
Notísia relevante: PVT kompromete sei estabelese desentralizasaun podér iha kada munisípiu
“Se imi fó podér polítiku mai iha partidu Verdes, ne’e urusan Estadu ninian, prezidente partidu jamin ba imi, sé karik ita hetan pasta Ministru Obra Públika, ita sei halo estrada ne’e lalais ba to’o aldeia sira,” António Lela Huno promete.
Prezidente Verdes ne’e akresenta, tuir loloos estrada liga hosi suku Oe-eleu ba postu administrarivu Lolotoe hotu ona, maibé kompañia implementadór laiha responsabilidade atu finaliza obra refere.
“Nia alat sira mós agora ferujen hotu ona, ne’e tanba governu halimar demais ho emprezáriu sira, tanbasá, emprezáriu sira mak suporta sira-nia partidu ba kampaña,” nia afirma.
Nia husu ba militante, simpatizante no apoiante sira hotu atu fó konfiansa ba PVT no halo serbisu maka’as iha baze nune’e ba ukun iha governu bele implementa programa refere hodi lori dezenvolvimentu ba povu munisípiu Bobonaro.
Programa prinsipál PVT nian hodi kompete iha eleisaun parlamentár tinan ne’e mak hanesan; aselera desentralizasaun administrativa no podér lokál, edukasaun no infromasaun (investe iha pré-eskolár, eskola tékniku vokasionál, no formasaun profisionál); Saúde (kuidadu saúde primária, sekundária no terseiru).
Nune’e mós inkluzaun sosiál, protesaun sosiál no solidaridade; infraestrutura (avansa ho sidade verdes); agrikultura, pekuária, peskas no florestas, Turizmu (dezenvolve turizmu komunitária, turizmu ekolojíku, turizmu aventura, turizmu relijiozu, turizmu istóriku, turizmu kulturál no etnográfiku); komérsiu no indústria; reforsa setór finanseiru; ikus liu mak kompromisu kontinua apoiu projetu tasi mane.
Notísia relevante: Os Verdes kompromete harii indústria peska iha Liquiçá
Jornalista: Sérgio da Cruz
Editór: Evaristo Soares Martins
