PUDD promete aselera podér lokál no desentralizasaun administrativa
MALIANA, 02 maiu 2023 (TATOLI) – Partidu Unidade Dezenvolvimentu Demokrátiku (PUDD), promete aselera implementasaun podér lokál no desentralizasaun administrativa banhira depozita votu konfiansa hosi Povu iha eleisaun parlamentár.
Sekretáriu Jerál PUDD, Aleixo de Carvalho, promete bainhira povu depozita konfiansa iha eleisaun parlamentár, sei tau prioridade atu defende no halais polítika podér lokál no desentralizasaun administrative hodi hakbesik ukun ba povu.
Sekretáriu Jerál PUDD hato’o kompromisu polítiku ne’e iha atividade kampaña ho tipu komísiu ne’ebé realiza iha kampu futeból Maliana vila, munisípiu Bobonaro, tersa ne’e.
Notísia relevante: PUDD prioriza dezenvolvimentu turizmu komunitáriu iha Maubisse
“PUDD nia programa prioridade ba munisípiu Bobonaro ita atu reforsa tán transferénsia podér lokál mai lalais, tanba munisípiu Bobonaro sai hanesan baliza fronteira no ona hanesan Prezidente Autoridade Munisípiu ne’ebé iha kompeténsia másimu atu jere ninia kompeténsia,” nia informa ba Jornalista sira, iha Maliana vila.
PUDD nia programa prioridade ida tanba munisípiu Bobonaoro mak hakarak reforsa pontu entrada nune’e bele kontribui reseita barak liután hodi hadi’ak povu nia moris.
“Ita reforsa pontu entrada razaun tanba reseita tama iha fronteita tama maka’as liu, entaun oinsá PUDD ba ukun hetan asentu parlamentár karik, atu reforsa ida-ne’e bodi reforsa Prezidente Autoridade jere ninia jestaun ne’ebé di’ak bele benefísia populasaun iha munisípiu Bobonaro,” Líder PUDD ne’e promete.
PUDD mós iha programa prioridade atu dezenvolve setór produtivu sira, liuliu agrikultura oins’a atu moderniza natar sirane’ebé iha munisípiu Bobonaro.
Sekretariu Jerál ne’e subliña, meiu ne’ebé PUDD uza atu moderniza natar la’ós atu fahe de’it tratór, maibé sei loke sentru formasaun profesionál ba área agrikultura nian, nune’e bele kapasita joven sira atubele sai produtivu liután.
“Ema enjeñeiru sira iha áre agrikultura ne’e ita lori fila-fali mai iha munisípiu, hanesan ha’u hateten desentralizasaun podér lokál,” nia katak.
Iha fatin hanesan, Sekretáriu Jerál PUDD munisípiu Bobonaro, Apolinario dos Santos, reforsa PUDD eziste la’ós atu kompete ho partidu boot sira, maibé atu ajusta programa ne’ebé antese ne’e governu implementa ona, nune’e bele aselera dezenvolvimentu nasionál no lori moris di’ak ba povu.
Bainhira hetan asentu paralamentár, PUDD mós sei fó prioridade ba setór saúde no setór edukasaun tanba maske governu konstrui ona infraestrutura eskolár barak maibé iha fatin balu sei kontinua halerik.
“Ami haree liuliu ba área rurál ne’e, ami Bobonaro oan haree tiha ona katak fatin barak mak eskola ladún di’ak, eskola iha duni maibé la favoravel ba ita nia oan sira atu estuda. Ida-ne’e karik povu fó fó fiar ba PUDD sei halo mudansa ba servisu edukasaun ninia atubele avansa liután,” Bobonaro oan ne’e promete.
Nia apela ba militante, simpatizante no apoiantes sira atu vota ba PUDD iha eleisaun lejiztaliva, 21 maiu 2023 nune’e bele implementá programa refere, tanba partidu ne’e eziste atu fanun no dudu partidu boot sira aselera dezenvolvimentu to’o baze.
Notísia relevante: Bainhira kaer ukun, PUDD sei fo prioridade ba agrikultura-edukasaun
Jornalista: Sérgio da Cruz
Editór: Evaristo Soares Martins
