VIQUEQUE, 03 maiu 2023 (TATOLI)—Komisaun Nasionál Eleisaun (CNE, sigla portugés) munisípiu Viqueque identifika iha funsionáriu balun partisipa iha kampaña eleitorál ba Eleisaun Parlamentár 2023 no uza fasilidade Estadu.
“Durante kampaña eleitorál la’o, ami identifika funsionáriu na’in-rua maka envolve iha kampaña iha oras serbisu no uza karreta Estadu ida, maibé karreta ne’e ami sei haree di’ak liután informasaun atu reforsa evidénsia tanba karreta Estadu ne’e mídia no Polísia sira mós uza,” Diretór CNE Viqueque, Honorio Cruz da Silva, informa ba Agência Tatoli, iha ninia knaar fatin, iha postu Viqueque Villa, kinta ne’e.
Notísia relevante : CNE husu partidu polítika respeita kalendáriu kampaña eleitorál
Nia dehan tan, funsionáriu rua ne’e daudaun dadus tama ona ba entidade relevante sira, enkuantu kona-ba karreta Estadu ne’e bainhira utiliza la tuir dalan maka sei prosesa.
Aleinde ne’e, durante atividade kampaña, CNE halo kolaborasaun di’ak ho Provedoria Direitu Umanu no Justisa (PDHJ, sigla portugés) no sempre realiza enkontru hodi ida-idak hala’o ninia knaar ho di’ak.
Oráriu kampaña eleitorál iha Viqueque kuaze mini kampaña, iha kinta (04/05) partidu CNRT hala’o atividade iha fatin lima hanesan suku Nahareka, postu Ossu no postu Viqueque Villa iha suku Uma Uain Kraik, iha área Uetali, Kailoi, Raitahu, Fatuhadan, enkuantu partidu KHUNTO tuir oráriu iha mini kampaña iha suku Nahareka no suku Fatudere iha postu Viqueque maibé kansela.
Jornalista : Vitorino Lopes da Costa
Editora : Julia Chatarina
