iklan

NASIONÁL, HEADLINE, SEGURANSA

Polísia detein sidadaun Indonézia na’in-lima iha Baucau

Polísia detein sidadaun Indonézia na’in-lima iha Baucau

Xefe Departamentu Investigasaun Kriminál Nasionál PNTL, Superintendente Xefe Jorge Monteiro, hamutuk ho ekipa hala'o konferénsia imprensa iha salaun Komandu Jerál PNTL, kinta (04/05/2023). Imajen Tatoli/Francisco Sony

DILI, 04 maiu 2023 (TATOLI)–Komandu Polísia Nasionál Timor-Leste (PNTL) munisípiu Baucau, iha loron 03 maiu 2023, halo deteinsaun ba sidadaun Weter-Indonézia na’in-lima tanba hatama ai konstrusaun ho ró iha postu administrativu Laga, munisípiu Baucau.

“Iha 03 maiu 2023 iha área Mulia, postu administrativu Laga, munisípiu Baucau Polísia Investigasaun Kriminál munisípiu Baucau detein sidadaun hosi Illa Wetar-Indonézia na’in-lima, sidadaun sira ne’e ho ró tula ai konstrusaun kúbiku 20 atu halo trazasaun ho sidadaun timor-oan ne’ebé hela iha Mulia ho identidade inisiál J,” Xefe Departamentu Investigasaun Kiminál Nasionál, Superentendente Xefe Jorge Monteiro, hateten liuhosi konferénsia imprensa, iha Kuartel Jerál PNTL, Caicoli, kinta ne’e.

Notísia relevante : PNTL detein suspetu rua iha Oé-Cusse tanba prátika atividade ilísitu

Daudaun sidadaun na’in-lima hosi Indonézia ne’e iha hela kontrolu Komandu PNTL munisípiu Baucau maibé prosesu identifikasaun ba sira sei kontinua hela. Enkuantu prosesu identifikasaun ba iha sidadaun timor-oan ne’ebé Polísia hetan halo tranzasaun hamutuk ho sidadaun Indonézia hodi transporta ai mai iha Timor-Leste, ne’e mós iha prosesu identifikasaun nia laran.

“Kona-ba ró ne’ebé sira utiliza tula ai mós iha hela kontrolu PNTL munisípiu Baucau nian. Atu hateten katak kazu ida-ne’e sei iha prosesu identifikasaun nia laran, kuandu ramata sei rejista iha Ministériu Públiku Baucau hodi kontinua prosesu,” nia akresenta.

Alende ne’e, sei transmite mós informasaun ba Adidu Seguransa Indonézia iha Embaixada Indonézia iha Timor-Leste atu nune’e sira bele hatene situasaun ne’ebé akontese no mós sira bele akompaña sira-nia sidadaun ne’ebé infrenta hela prosesu iha rejiaun Timor.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!