DILI, 04 maiu 2023 (TATOLI)–Xefe Departementu Investigasaun Kriminál Nasionál Polísia Nasionál Timor-Leste (PNTL), Superentendente Xefe Jorge Monteiro, informa Polísia identifika ona suspeitu ne’ebé utiliza osan falsu ho valór $20 tahan ida sosa sasán iha kioke ida iha aldeia Sawarika, suku Fuiluro, postu administrative Lospalos, munisípiu Lautém.
“Akontesementu ne’e iha kuarta (03/05) lorokraik, bazeia ba informasaun ne’ebé ami hetan hosi vítima katak ema ne’ebé utiliza osan falsu hodi sosa sasán ne’e uza máskara nune’e nia labele identifika sé loos mak lori osan ne’e halo tranzasaun iha ninia kioske, maibé parte Polísia nian dezenvolve ona informasaun ne’ebé iha, pesoál ne’e konsidera hanesan suspeitu, ami identifika ona no sei bolu hodi rona informasaun hosi nia rasik,” Superentendente Xefe Jorge Monteiro, hateten liuhosi konferénsia imprensa, iha Kuartel Jerál PNTL, Caicoli, kinta ne’e.
Notísia relevante : TDD aplika medida proibisaun auzénsia ba arguidu lori osan falsu hosi Inglaterra
Nia dehan, osan falsu ne’e Komandu PNTL munisípiu Lautém foti ona no vítima ba osan falsu ne’e polísia halo identifikasaun.
“Bainhira prosesu ne’e ramata, ita deside rejista iha Ministériu Públiku hodi nune’e bele iha prosesu investigasaun kle’an atu ita bele hatene osan falsu ne’e mai hosi ne’ebé,” nia akresenta.
Jornalista : Antónia Gusmão
Editora : Julia Chatarina
