HEADLINE, JUSTISA

TDD aplika medida proibisaun auzénsia ba arguidu lori osan falsu hosi Inglaterra

TDD aplika medida proibisaun auzénsia ba arguidu lori osan falsu hosi Inglaterra

PCIC detein Suspeitu lori osan falsu hosi Inglaterra.Imajen/Natalino Costa

DILI, 27 jullu 2022 (TATOLI)– Tribunál Distritál Dili (TDD), kuarta ne’e, liuhosi julgamentu Interrogatóriu dahuluk, deside aplika medida koasaun proibisaun auzénsia ka bandu labele sai hosi territóriu nasionál  ba Arguidu ho insiál SDCF ne’ebé lori osan falsu hosi Inglaterra.

Polisia Siéntifika Investigasasaun Kriminál (PCIC, sigla Portugés), halo detesaun, apreensaun no buska, bainhira arguidu SDCF hala’o transaksaun osan falsu ho montante $1.600 iha Banku Sentrál Timor-Leste (BCTL), Mandarin Dili.

Iha Interrogatóriu dahuluk ne’e, Ministériu Públiku promove arguidu ho krime pasajen moeda ne’ebé previstu iha artigu 308 hosi Kódigu penál Timor-Leste.

Durante Julgamentu, arguidu SDCF konfeza ba Tribunál katak osan sira ne’ebé nia  halo trasaksaun iha  BCTL ne’e nu’udar nia osan rasik ne’ebé nia lori hosi Inglaterra no hodi ba troka atu sosa nesesidade privadu.

Nune’e, iha prosesu alegasaun Ministériu Públiku husu tribunál atu aplika medida koasaun proibisaun auzénsia ba arguidu tanba iha indísiu katak arguidu lori osan falsu mai Timor-Leste.

Maibé, Defeza hosi arguidu husu atu tribunál aplika Termu Identidade Rezidénsia (TIR) ba nia kliente.

Hafoin rona parte hotu, Tribunál deside aplika medida koasaun proibisaun auzénsia ba arguidu SDCF, ne’ebé previstu iha artigu 192 hosi kodigu prosesu penál Timor-Leste.

Iha artigu 192, kona-bá Proibisaun atu sai, katak kuandu krime dolozu bele fo-fatin ba pena prizaun aas liu tinan tolu.

Iha aliña a, sita katak aplika ba arguidu proibisaun atu sai ba estranjeiru ka atu sai ba estranjeiru molok hetan autorizasaun, hasai tiha nia pasaporte, no fo-hatene proibisaun ne’e ba autoridade ne’ebé halo pasaporte no autoridade ne’ebé kontrola fronteira;

Enkuantu, aliña b hateten aplika ba arguidu proibisaun atu sai hosi fatin ne’ebé nia hela ka atu sai hosi fatin ne’e molok hetan autorizasaun.

Tribunál konsidera aplika medida ne’e ho adekuadu no proprosionál tanba prosesu inkretu ba arguidu sei la’o hela no medida ne’e nu’udar asaun preventiva ida atu arguidu labele sees hosi justisa no tenke koopera ho parte justisa.

Defeza hosi arguidu Sergio Gama Lobo da Silva Junior, hateten nia-parte aseita katak medida koasaun proibisaun auzénsia ne’e adekuadu no proporsionál.

Audénsia julgamentu ne’e, prezide husi juís singular, Ana Paula Fonseca, MP reprezenta husi Prokuradór Ricardo Leite Godinho, Arguidu hetan asisténsia legál husi Advigadu Privadu Sergio Gama Lobo da Silva Juniór.

Notísia relevante:  PCIC detein timoroan ida lori osan falsu hosi Inglaterra

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!