Alkatiri prontu nafatin hala’o debate ho Xanana
DILI, 05 maiu 2023 (TATOLI)—Sekretáriu Jerál partidu FRETILIN, Mari Alkatiri, hateten maske pedidu partidu FRETILIN nian la aseita atu halo debate, maibé nia parte prontu nafatin atu hala’o debate ho Prezidente Partidu CNRT, Kay Rala Xanana Gusmão, ba tema saida de’it iha tempu tuir mai.
Notísia Relevante: FRETILIN hakarak debate ho CNRT kona-ba Ró Haksolok atu povu esklaresidu
“La’ós ha’u mak hakerek maibé sira sekretáriadu serbisu agora reprezenta FRETILIN iha STAE ho CNE mak hakerek ba CNE husu CNE atu organiza debate ida-ne’e, CNE husu fila-fali ba Prezidente CNRT no sira responde dehan agora tempu kampaña la’ós atu debate. Iha parte seluk, debate ne’e halo parte kampaña, se debate labele iha kampaña entaun la’ós kampaña. Ha’u prontu nafatin atu halo debate dala ida ka rua ho tema ita bele hili,” Mari Alkatiri hateten ba jornalista sira liuhosi konferénsia imprensa iha sede Komité Sentrál Fretilin (CCF), Comoro, sesta ne’e.
Antes ne’e, Adjuntu Sekretáriu Jerál Partidu FRETILIN, Flávio Maria da Silva, hateten loos duni husu ba Komisaun Nasionál Eleisaun (CNE, siglá portugés) atu organiza debate ida ho CNRT tambá iha komísiu kampaña eleitorál adversáriu foti kestaun kona-ba fronteira marítima ho Ró Haksolok.
“Loos duni katak partidu FRETILIN hato’o pedidu ida ba CNE atu organiza debate asuntu ida fronteira marítima no asuntu ida seluk mak Ró Hakslok, tambá sa FRETILIN husu debate, tambá ita nia adversáriu iha enkontru no komisíu sira ko’alia kestaun rua ne’e,” nia hateten.
Tambá ne’e, FRETILIN konsidera asuntu ne’e foti beibeik di’ak liu ita provoka debate ruma hodi esklarese ba públiku, se lae ema kontinua utiliza asuntu rua sai kestaun.
“Feliszente pedidu FRETILIN nian ba CNE, ami la haruka karta ba CNRT lae, FRETILIN husu ba CNE atu organiza debate ba kestaun rua ne’e, maibé simu fali resposta hosi CNE katak CNRT la aseita ou la simu atu halo debate,” nia dehan.
Nia hateten, ida-ne’e hanesan konvite ida hosi FRETILIN hato’o ba CNE maibé to’o ikus partidu la hetan reposta tanba partidu CNRT laiha tempu atu debate.
“Atu dehan ba públiku katak, hakarak ne’e atu klarifika liuhosi debate ne’e, maibé komu adversáriu la aseita,” nia hateten.
Enkuantu iha loron 25 abríl ne’e, Portavós ba kampaña partidu CNRT, Roberto Soares, fó sai pozisaun partidu CNRT nian hodi deklara katak laiha tempu atu debate ho pedidu hosi partidu FRETILIN atu halo debate kona-ba asuntu fronteira marítima ho Ró Haksolok.
Roberto Soares hakarak informa mós ba públiku eleitoradu sira katak bazeia ba karta pedidu hosi partidu FRETILIN iha loron 20 fulan-abríl tinan 2023 ho númeru referénsia 37/SNCCF/2023, nune’e mós pedidu opiniaun mai hosi CNE kona-ba asuntu debate markadu ba loron 22 abríl 2023.
“Prezidente CNRT hato’o hanoin hirak tuir mai, husu deskulpa ba CNE tanba konsidera katak iha períodu kampaña eleitorál partidu CNRT sei laiha tempu ba debate espesifiku kona-ba asuntu fronteria marítimu no Ro Haksolok,” Kordenadór Kampaña Paritu CNRT ne’e hato’o pozisaun partidu nian liuhusi konferénsia imprensa ba jornalista sira iha sede partidu CNRT, Bairru dos Grolhos.
Nia hatutan, fronteira marítima asina ona hosi Governu dahitu iha ONU no mós ratifika ona iha Parlamentu Nasionál no partidu FRETILIN deklara ona ninia votu kontra ba tratadu fronteira marítima ho nia anexu sira.
Nia dehan, molok atu asina no ratifika prosesu fronteira marítima, iha tempu ne’eba Primeiru-Ministru, Rui Maria de Araújo, sempre konvoka enkontru altu nível Estadu nian
hodi hato’o rezultadu negosiasaun kona-ba fronteira maritima.
“Ró Haksolok laiha ona oportunidade atu diskute tanba prosesu investigasaun
la’o ona iha CAC ho Ministériu Públiku. Tanba ne’e, sei laiha debate apropriadu ba
matéria referida, tanba se lae, ita influénsia opiniaun públika hodi divulga
segredu justisa,” nia dehan.
Partidu CNRT konsidera tema debate kona-ba fronteira marítima finaliza tiha ona, só falta de’it fronteira terrestre ho Indonézia no Ró Haksolok nia prosesu iha Ministériu Públiku
Notísia Relevante: CNRT laiha tempu debate ho FRETILIN kona-ba fronteira marítima-Ró Haksolok
Jornalista : Nelson de Sousa
Editór : Cancio Ximenes
