LAUTÉM, 05 maiu 2023 (TATOLI)-Eskola CAFE (Centro Aprendizagem e Formação Escolar) Lospalos, munisípiu Lautém la komemora loron Mundiál Língua Portugeza tanba eskola iha périodu feriadu nia laran.
“Eskola CAFE iha Lospalos Vila la selebra Loron Mundiál Lian Portugés, tanba estudante no Profesór sira sei iha périodu feriadu nia laran. Maibé, eskola CAFE iha Lospalos kontribui ona ba dezenvolvimentu língua Portugeza liuhosi atividade hanorin no aprende ba estudante sira iha munisípiu Lautém,” Koordenadór interinu, Francisco Quadros hateten, ba Agência TATOLI iha nia edifísiu Kampaun Madre Canossiana, Lospalos vila, iha sesta ne’e.
Notísia relevante:Portugál kontinua deklara apoiu eskola CAFE iha TL
Responsável ne’e esplika, dezenvolvimentu lian Portugés iha eskola CAFE Lospalos iha progresu signifikativu, tanba kuríkulu no matéria aprendijazen hotu uza lian Portugés no iha obrigasaun ba estudante sira husi pre-eskolár to’o sekundária hotu tenke uza lian Portugés iha eskola.
“Dezenvolvimentu Lian Portugés iha eskola hatudu progresu signifikativu. Ida ne’e ita bele atinji tanba profesór lubuk ida husi Portugal mak ajuda profesór lokál sira hodi hanorin no dezenvolve lian Portugés iha eskola CAFE Lospalos,” nia dehan.
Koordenadór Francisco Quadros, subliña, maski eskola CAFE Lospalos sei iha difikuldade balun, maibé ne’e la’ós kestaun ida atu hapara dezenvolvementu eskola CAFE iha Lautém.
“Difikuldade ne’ebé ami hasoru mak, uainhira estudante fila ba uma sei nafatin konversa lian Fataluku maibé iha eskola estudante hotu hakerek lian Portugés liuhosi matéria aprendizazen no komunika lian Portugés ho di’ak entre estudante sira ho profesór sira iha aula no arredór eskola,” nia akresenta.
Kona-ba prosesu aprendijazen, Koordenadór interinu ne’e hateten, kada aula másimu akomoda estudante 30 no laiha difikuldade tanba eskola CAFE iha Lospalos sufisiente hodi akumula estudante hirak ne’e.
“Ita iha estudante hamutuk 887, kompostu husi pré-eskolár 120 alunu, estudante eskola bázika hamutuk 399, Pré-sekundáriu hamutuk 204 no sekundáriu hamutuk 164 alunus. Entertantu iha profesór Timoroan hamutuk 17 no Profesór husi Portugal hamutuk na’in sia,” nia informa.
Iha ámbitu komemorasaun loron mundiál lian Portugés ne’e, Koordenadór ne’e rekomenda ba Governu liuhosi Ministériu Edukasaun atu kontinua halo kooperasaun ho Portugal hodi bele dezenvolve liutan eskola CAFE, hodi implemeta lian Portugés sai hanesan referénsia ba eskola hotu iha Timor – Leste.
Notísia relevante:MEJD ho Institutu Camões estende akordu programa formasaun lian Portugés
Journalista: Camilio de Sousa
Editora : Nelia Borges
