ERMERA, 08 maiu 2023 (TATOLI) – Partido Socialista de Timor (PST), hato’o niania kompromisu polítika ba militante no simpatezante iha Postu Adminsitrativu Hatulia B, munisípiu Ermera katak bainhira povu fó fiar kaer governu, PST sei loke fabrika kafé iha Glenu-Ermera.
“Kafé husi Ermera laran tomak sei akumula hotu iha Glenu. Husi ne’e mak Estadu foin define kafé nia folin. Se kompañia mak sosa, entaun ita lohi malu kona-ba folin kafé. Mas kuandu Estadu iha regras, entaun kafé nia folin protezidu,” Prezidente Partido Socialista de Timor (PST), Avelino Coelho afirma polítika PST iha Suku Fatubolu, Postu Administrativu Hatulia B, Munisípiu Ermera, segunda ne’e.
Nia dehan, kafé husi Ermera laran tomak sei akumula iha Glenu, atu nune’e bainhira kafé sai husi Ermera, sei sai ho brand Kafé Ermera: “Ida ne’e mak PST defende kafekultór Ermera.”
“Vantazen husi Fábrika Kafé ne’e mak transforma kafé sai ‘Agrikultura Indústrializada’ katak ita moderniza modelu kuda kafé, moderniza modelu prosesa kafé, atu nune’e kafé sai husi Glenu tenke sai ho marka Kafé Ermera,” Avelino esplika.
Nia dehan iha kompañia ki’ikoan balun, hahú ona ho buat ki’ik hanesan ‘Maubere Mountain Coffee’, husi Laklubar.
“Entaun iha Ermera ne’e ita bele halo bo’ot liu ida ne’e ho Estadu nia intervensaun. Se karik iha ona indústria ida iha Glenu, Ekonomia Ermera tomak sei book-an. Povu Ermera nia produtu komérsial mak kafé tanba iha fábrika kafé iha Glenu,” léder máximu PST ne’e salienta.
Nia dehan ho estabelesimentu fábrika kafé ne’e sei lori povu sai husi mukit no ki’ak ba moris di’ak.
Entertantu, PST mós kompromete sei fó sibsídiu ba kafekultór sira hodi kontinua kuda no halo rehabilitasaun ba kafé tuan sira.
“PST defende subsídiu ba povu agrikultór sira. Kafekultór Joven sira sei fila ba sira-nia toos hodi hadi’a plantasaun kafé. Ita bolu rejuvenesimentu plantasaun kafé. Katak transforma plantasaun subsisténsia ba plantasaun kafé komérsial no indústrializadu. Tanba ne’e tenke muda uluk prosesu dulas kafé. Se durante ne’e ita dulas ho mákina-ai ka manual, entaun tenke dulas ho mákina besi para hasa’e kualidade kafé,” Avelino dehan.
Jornalista: Filomeno Martins
Editora: Nelia Borges
