COVALIMA, 08 maiu 2023 (TATOLI)–Diretór Munisipál Konservatóriu Rejistu Notariadu Covalima, António Sarmento informa, hahú fulan-janeiru no frevreiru tinan ne’e, Rejistu Notariadu Covalima konstribui ona reseita $8,450 ba kofre Estadu.
“Iha fulan-janeiru no fevreiru de’it mak ami halo atendimentu ba sidadaun trata Pasaporte eletróniku durante fulan rua, sidadaun na’in-166 mak trata ona pasaporte ho totál orsamentu $8,450 hodi kontribui ba kofre Estadu,” António Sarmento relata dadus ne’e ba Agência Tatoli, iha nia kna’ar fatin Santa Rosa, segunda ne’e.
Totál sidadaun ne’ebé trata pasaporte iha Rejistu Notariadu Covalima hamutuk na’in 166 ne’ebé trata dokumentu iha fulan-janeiru ne’e iha sidadaun na’in-118 no fulan-fevreiru iha sidadaun na’in-48,
Nune’e, tuir nia, bainhira tama iha fulan-marsu no abríl ne’e labele halo atendimentu ba sidadaun sira-ne’ebé atu trata pasaporte eletróniku iha munisípiu Covalima tanba laiha kaderneta pasa porte.
“Iha fulan-marsu no abríl, ami la halo atendimentu sidadaun trata pasaporte, tanba limitasaun kaderneta pasaporte bainhira ami simu informasaun husu dirasaun jerál hatama ona pasaporte foin bele halo atendimentu,” nia dehan.
Bazeia rejistu notariadu simu informasaun katak iha fulan-maiu ne’e maibé se lae bele to’o iha fulan-jullu mak kaderneta pasaporte nian to’o mai, nune’e hosi munisípiu hein de’it hosi nasionál.
Aleinde diretór informa kana-ba reseita, nia informa, hahú fulan-janeiru to’o sidadaun trata sertidaun moris hamutuk 11,60, sertidaun kazamentu na’in-36, sertidaun óbitu 35 no sidadaun trata rejistu kriminál hamutuk 852.
Jornalista : Celestina Teles
Editór : Cancio Xinenes
