Alkatiri: “Iha situasaun triste hamutuk transforma ita-nia susar ba forsa”
DILI, 24 Juñu 2026 (TATOLI) – Sekretáriu-Jerál Partidu Frente Revolusionária Timor-Leste Independente (FRETILIN), Marí Alkatiri, apela ba povu tomak atu hamutuk iha situasaun difísil ho eis-Prezidente Repúblika, Francisco Guterres “Lú Olo”, nia mate hodi transforma situasaun triste ida-ne’e ba forsa.
“Transforma ita-nia susar ba forsa. Sé ida mak susar ho Maromak nia ajuda fó forsa ba ita hotu atu hatene katak ita sei iha dalan naruk atu la’o hamutuk. Ida-ne’e mak importante liu ba povu tomak, ba militante no kuadru FRETILIN ninian”, Marí Alkatiri hateten iha konferénsia imprensa ne’ebé hala’o iha Faról, ohin.
Ho motto FRETILIN nian Unir para Transformar “halibur para atu hadi’a ne’e mak ha’u aproveita loron susar ba ita hotu, ba ha’u espesialmente, ba família espesialmente liután, maibé tenke buka dalan atu transforma ita-nia susar ne’e ba forsa”, nia reitera.
Alkatiri haktuir kona-ba koversa entre nia ho maktoban Lú Olo katak “ita rua ne’e enkuantu serbisu hamutuk, enkuantu ita ida bá ona, ida mak hela tenke kontinua serbisu. Ha’u lembra fali mensajen ida-ne’e ho mensajen uluk Prezidente Nicolau hateten mai ha’u, obriga ha’u sai. Ha’u dehan ita hahú hamutuk, bele kontinua hamutuk iha idaidak nia fatin, labele mate hotu dala-ida”, nia dehan.
Sekretáriu-Jerál realsa katak mensajen husi maktoban repete fali mensajen ne’ebé antes ne’e hato’o ona. “Ha’u dehan tanba sá ha’u mak tenke simu todan. Prontu, ha’u simu. Ha’u simu más ha’u sei iha forsa bainhira ema FRETILIN tomak fó forsa mai ha’u, bainhira povu tomak fó fiar mai ha’u”.
Ba Alkatiri, Lú Olo ema ida ne’ebé moos tebes, transparente, no laiha korrupsaun. Hanesan nia deklarasaun hateten “ita iha buat ruma ona iha ita-nia bikan tanba saida ita tenke ba hasai fali sasán ne’ebé husi ema nia dapur ne’ebé laiha buat ida”, dehan.
Nia haktuir katak bainhira maktoban bá halo tratamentu iha Malázia, nia mós sai husi Timor-Leste hodi tuir bá, tanba situasaun ezije nia atu apoia ba família no nia mós hola parte ba família.
Hodi relata katak nia ko’alia ikus ho antigu Prezidente dala-ida de’it, tanba iha ICU ne’ebá la’ós ema livre tama no sai. “Iha ne’ebá la’e, só médiku mak bele tama”, katak.
Hodi realsa katak eis-Prezidente forte tebes no espera katak nia filafali mai, maibé situasaun lahanesan.
Francisco Guterres “Lú Olo” termina ninia peregrinasaun iha mundu iha loron 21 Juñu, iha Ospitál Prince Court, Kuala Lumpur, Malázia, ho idade 71, iha ne’ebé nia simu hela tratamentu médiku intensivu.
Nia moris iha Ossú, munisípiu Vikeke, iha loron 7 fulan-Setembru tinan 1954. Nia dedika parte boot husi nia moris ba luta libertasaun nasionál, kaer responsabilidade oioin iha rezisténsia durante okupasaun indonézia. Hafoin Konis Santana nia mate iha tinan 1998, nia asume lideransa polítika rezisténsia timorense nian.
Notísia relevante: Ramos-Horta fó omenajen ba Lú Olo no destaka nia eransa ba nasaun
Jornalista: Arminda Fonseca
Editora: Maria Auxiliadora
