iklan

EDUKASAUN, HEADLINE, LIQUIÇÁ

Benefisiáriu bolsa méritu 285 iha Liquiçá seidauk aprezenta konta bankária

Benefisiáriu bolsa méritu 285 iha Liquiçá seidauk aprezenta konta bankária

Diretór Servisu Edukasaun Liquiçá, Carlos Lopes.

DILI, 09 maiu 2023 (TATOLI) – Estudante benefisiáriu bolsa méritu 285 iha Liquiçá seidauk submete konta bankária, maski prosesu loke konta refere hahú ona, informa Diretór Servisu Edukasaun Liquiçá, Carlos Lopes.

“Ita haruka ona konta bankária estudante hamutuk 344 nian ba Ministériu Edukasaun atu prosesa no iha tempu badak ne’e bele transfere osan ba ida-idak nia konta”, dirijente edukasaun dehan ba Tatoli via telefone, tersa ne’e.

Nia salienta Servisu Edukasaun Munisipál seidauk simu informasaun hosi benefisiáriu sira ne’ebé seidauk iha konta, tanba tempu ne’ebé ministériu fó ba sira atu trata dokumentu ne’e limitadu.

“To’o agora lahatene razaun tanba saida maka sira seidauk hatama konta bankária. Ita partilla ona informasaun ba inan-aman sira bá trata konta bankária, maibé to’o agora ami hein laiha informasaun. Se sira mak la lori mai to’o data determinadu no bainhira taka ona, ita labele halo buat ida”, nia realsa.

Rekorde katak akordu ne’ebé maka asina ona entre Ministériu Edukasaun, Juventude no Desportu (MEJD) ho Banku Nasionál Komérsiu Timor-Leste (BNCTL) hatete pagamentu ba estudante bolsa méritu sira sei lahalo direta, maibé liuhosi prosesu transfere osan ba ida-idak nia konta.

Tanba ne’e, BNCTL loke oportunidade ba benefisiáriu sira atu trata sira-nia dokumentu, nune’e bele fasilita banku hodi transfere osan ba sira.

Lista jerál ne’ebé MEJD anunsia ona ba públiku katak benefisiáriu iha territóriu nasionál ne’ebé tama kategoria nu’udar estudante mellór klasifikadu atu hetan bolsa méritu hamutuk 13.517.

Notísia relevante: Estudante bolsa méritu 176 iha Aileu seidauk iha konta bankária

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!