DILI, 09 maiu 2023 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten Governu liuhosi Ministériu Obras Públika (MOP) iha kompromisu, daudaun ne’e kontinua normaliza estrada liga ba sentru votasaun iha eleisaun parlamentár 2023.
Notísia Relevante: Reprezentante povu iha PN husu IGEADE, I.P normaliza estrada ba sentru votasaun
“Atu informa de’it ba Deputadu sira problema sira-ne’ebé levanta iha ne’e, ami hakarak informa hela horisehik ami haruka kedas ba señior Ministru Obras Públika (MOP) hodi haree liu-liu kona-ba dalan ne’ebé asesu atu halo votasaun eleisaun ninian. Ministru Obras Públika informa ba ami iha tempu liu ba mós, kazu sira ne’e liu-liu kona-ba estrada sira-ne’e iha ona memorandum ida-ne’ebé asina akordu entre STAE ho Obras Públika no Obras Públika fó apoiu atu hadi’a estrada. Ha’u hanoin la’o namanas hela, soké ita-nia problema ida ita hasoru mak loro-loron udan nafatin. Ita hadi’a tiha, lorokraik udan tun mai, nia sobu tiha fila-fali,” Francisco Martins da Costa Pereira Jerónimo hateten hodi responde ba preokupasaun Deputadu sira-nian iha reuniaun plenária Parlamentu Nasionál, tersa ne’e.
Governante ne’e hateten, Governu nafatin iha kompromisu katak bainhira to’o eleisaun sentru votasaun sira-ne’ebé mak iha sei realiza hotu no loke dalan halo duni votasaun iha fatin sira-ne’eba, ho posibilidade saida de’it sei halo hodi rezolve problema liu-liu kona-ba eleisaun atu nune’e mobiliza ema hotu tuir eleisaun.
Antes ne’e, Prezidente Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE, I.P), Hermenegilda da Costa Laurentina, informa IGEADE, I.P finaliza ona pedidu 300-resin kona-ba melloramentu ba estrada no loke foun hasoru eleisaun parlamentár no daudaun kontinua normaliza pedidu sira seluk ne’ebé simu.
Notísia Relevante: Hasoru ElPar, IGEADE,I.P finaliza pedidu 300 resin
Jornalista : Nelson de Sousa
Editór : Cancio Ximenes
