EKONOMIA, HEADLINE

Hasoru ElPar, IGEADE,I.P finaliza pedidu 300 resin

Hasoru ElPar, IGEADE,I.P finaliza pedidu 300 resin

Prezidente Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE,I.P), Hermenegilda da Costa Laurentina. Imajen Tatoli /Egas Cristóvão

DILI, 05 abril 2023 (TATOLI)— Prezidente Institutu Jestaun Ekipamentu no Apoiu Dezenvolvimentu Infraestrutura Institutu Públiku (IGEADE,I.P), Hermenegilda da Costa Laurentina, hateten, IGEADE,I.P finaliza ona pedidu 300 resin kona-ba melloramentu ba estrada no loke foun.

“Pedidu ne’ebé tama mai atu halo melloramentu estrada no loke estrada foun nian hamutuk 500 resin. Hosi númeru pedidu 300 resin mak ita finaliza ona no 200 mak seidauk finaliza. Maibé ita halo esforsu nune’e bele fasilita ita-nia komunidade iha tempu kampaña no Eleisaun Parlamentár (ElPar) ne’ebé sei realiza iha tinan ne’e,” Hermenegilda da Costa Laurentina dehan ba Agência Tatoli, iha nia-knaar fatin Colmera, Dili, segunda ne’e.

Nia hateten, antes ne’e Primeiru Ministru Taur Matan Ruak, orienta IGEADE,I.P atu halo melloramentu, no loke estrada foun iha área rurál, atu fasilita komunidade ba iha kampaña no Eleisaun Parlamentár.

Hermenegilda isplika, pedidu ne’ebé tama iha IGEADE,I.P iha parte rua mak pedidu emerjénsia no pedidu normal. Ho ida ne’e, sei  haree uluk ba pedidu emerjénsia no IGEADE,I.P tenke atende uluk mak foin haree fali ba pedidu normal.

Nia dehan, pedidu atu halo melloramentu ba estrada no loke foun ne’e, iha munisípiu sira hotu maibe la inklui Rejiaun Administrativa Espesiál Oé-Cusse Ambeno (RAEOA).

Estrada foun sira ne’ebé IGEADE,I.P loke mak hanesan iha suku Gugleur, postu administrativu Maubara munisípiu, Liquiça hamutuk 13 kilómetru ne’ebé aldeia 12 mak atu asesu ba eleisaun no sei  finaliza  10 kolómetru no restu seidauk. Iha fali suku Caicasa postu administrativu Fatuberliu, munisípiu Manufahi 34 kilómetru seidauk finaliza no servisu sei kontinua hela, nomos inklui munisípiu sira seluk.

Kona-ba melloramentu estrada nia mak daudaun ne’e, ekipa IGEADE,I.P liuhosi nia Brigada lima ne’ebé destaka iha munisípiu sira kontinua halo servisu iha terrenu hanesan, Brigada Daitula kobre servisu iha Baucau, Lautém no Viqueque. Ho ida ne’e, daudaun ne’e, normaliza hela mota Samalari iha Baucau-Villa no loke estrada ba Bucoli nian.

Parte hosi munisípiu Lautém nian halo melloramentu estrada hosi Lautém ba Lospalos Vila no kondisaun agora to’o ona iha suku Rasa no iha tempu badak sei finaliza to’o Lospalos, no kontinua ba suku Lore.

Brigada Rosa Muki Bonaparte sei kobre ba Manatuto, Manufahi no Ainaro, no daudaun ne’e ekipa halo hela normalizasaun irrigasaun natar nian iha Laclo no loke estrada hosi suku Laicore ba aldeia Licore.

Brigada Samba 9, kobre Aileu, Liquiça no Dili sorin, no daudaun ekipa halo servisu iha terrenu hanesan loke estrada iha Liquiça no melloramentu estrada hanesan iha Aileu hosi Faturasa mai iha Remexio.

Brigada Maria Tapo, kobre servisu hosi Bobonaro, Covalima no Ermera. Munisípiu tolu ne’e dook malu, maibé ekipa tékniku servisu nafatin hanesan iha Covalima suku Fatumea nian halo melloramentu estrada ne’ebé kotu, no halo melloramentu estrada Balibo Maliana nian ba iha Batugade, postu seguransa Unidade Patrullamentu Fronteira (UPF) nian.

Nia dehan durante servisu, IGEADE,I.P servisu hamutuk ho Ministériu Obra Públika (MOP) no Ministériu Finansa (MF).

Aleinde ne’e, Brigada Sebastião Gomes nu’udar brigada ne’ebé rezerva iha Dili atende situasaun emerjénsia sira, no daudaun ekipa tékniku halo melloramentu mota Metinaro, Bidau mota klaran no parte Lagoa Tasi-Tolu nian.

Nune’e, brigada ne’e rasik, daudaun halo melloramentu estrada iha Ermera tanba tuir dadus ne’ebé IGEADE,I.P hetan iha estrada iha fatin neen (6) mak kotu, inklui mós mota haat (4) ne’ebé fó ameasa ba komunidade área ne’ebá.

“Maibé ita halo nafatin esforsu koloka mákina pejadu sira iha terrenu atu atende situasaun sira ne’e, no estrada parte Hatulia Ermera nian MOP orienta ona kompañia sira atu atende lalais situasaun ne’e, hodi fasilita komunidade ba iha eleisaun nian. Ita sei halo esforsu servisu hotu nune’e antes eleisaun estrada sira bele asesu ona,” nia dehan.

Jornalista : Arminda Fonseca

Editora     : Armandina Moniz

 

 

iklan
iklan

Leave a Reply

iklan
error: Content is protected !!