DILI, 10 maiu 2023 (TATOLI)-Reprezentante povu iha Uma Fukun Parlamentu Nasionál, tersa ne’e, halo ona aprovasaun ba proposta lei finansa munisipál iha finál globál ho votu a-favór 38, kontra no abstensaun 0.
Prezidente Parlamentu Nasionál, Aniceto Longuinhos Guterres Lopes, hateten ho aprovasaun ida ne’e kompleta ona pakote lejislasaun ba podér lokál nian ne’ebé antes ne’e PN aprova ona lei eleisaun munisipál, lei podér lokál no lei ida ne’e mai kompleta pakote hodi implementa polítika desengtralizasaun no podé lokál.
Notísia Relevante :PN aprova proposta lei Finansa Munisipál iha faze jeneralidade
“Parabéns ba Governu no Parlamentu Nasionál ita konsege aprova signifika kumpre ona Governu ho PN nia dever nu’udar lejisladór iha mateira ida ne’e, tanbá aprovasaun finál globál ona ita sei envia iha tempu badak ba Prezidente Repúblika mak iha kompeténsia atu promulga ka kala’e asume responsabilidade perante ba povu,” Aniceto Longuinhos Guterres Lopes, hateten iha sala plenária PN.
Nia hateten ho aprovasaun ne’e sei halo redasaun finál antes haruka ba Prezidente Repúblika, José Ramos Horta hodi promulga iha tempu badak nia laran.
Antes ne’e, Ministru Administrasaun Estatál (MAE), Miguel Pereira de Carvalho, hateten proposta-lei ne’e sei regula no jere Orsamentu Jerál Estadu (OJE) nian iha munisípiu sira hotu.
“Ita halo ida ne’e atu óinsa mak bele define hodi munisípiu halo prosesu orsamentasaun ho halo planeamentu no relatóriu ida. No define prinsípiu orsamentasaun planu orsamentu podér lokál,” Nia hateten.
Iha proposta lei ne’e mós sei elabora kona-ba óinsa munisípiu sira bele empresta sujeitu ba aprovasaun hosi Governu sentrál no define mós kona-ba orsamentu saida mak sei fó ba munisípiu ba podér lokál bainhira aprova OJE ne’e.
Proposta lei finansa munisipál ne’e aprova kompleta ona kuadru legál sira hotu-hotu kona-ba estabelesimentu podér lokál, no ho aprovasaun ne’e sei kompleta tan lei tolu seluk ne’ebé mak mandatu oitavu Governu konstituisionál aprova hanesan lei divizaun administrativa, lei podér lokál no desentralizasaun administrativa no mós lei eleisaun munisipál.
Notísia Relevante :MAE disemina lei poder lokál-lei eleisaun munisipál ba autoridade Covalima
Jornalista : Nelson de Sousa
Editór : Agapito dos Santos
