DILI, 11 maiu 2023 (TATOLI) – Membru FALINTIL-Forsa Defeza Timor-Leste (F-FDTL) na’in-50 tuir ona formasaun iha Sentru Nasionál Formasaun Profisionál (SNFP) Becora atu hasa’e sira-nia koñesimentu hodi prepara-aan ba futuru.
Konselleiru no Pontu Fokál Sekretaria Estadu Formasaun Profisionál no Empregu (SEFOPE) iha SNFP Bekora, Fernando Carvalho de Araújo, hatete partisipasaun membru F-FDTL iha formasaun refere liuhosi akordu ne’ebé sentru ne’e halo ona ho Komandu F-FDTL iha fulan rua liubá.
Akordu ne’e hakarak atu kada tinan sentru ne’e bele loke espasu ba membru forsa defeza sira atubele partisipa iha formasaun profisionál hodi hasa’e sira-nia abilidade atu dezenvolve instituisaun ba futuru.
“Membru sira ne’e mai hosi unidade Komponente Navál, unidade Metinaru no unidade Kuartél-Jerál Fatuhada. Ita-nia intensaun atu forma sira sai ema profisionál, ne’e duni ho sira na’in-50 tuir iha faze dahuluk ne’e, sei loke oportunidade ba membru sira seluk atu kontinua tan formasaun ne’e”, Fernando de Araújo dehan ba Tatoli.
SNFP konsidera akordu ne’e iha progresu tanba membru F-FDTL sira hatudu vontade atu aprende. “Ne’e hatudu katak servisu hamutuk ho instituisaun FALINTIL-Forsa Defeza Timor-Leste atu forma membru sira iha área téknika sei la saugati. Ne’e pasu di’ak ida tanba bele ona loke nia-aan la’ós fó formasaun ba de’it joven sira, maibé mós instituisaun Estadu inklui defeza no seguransa sira”.
Sentru ne’e mós halo hela esforsu atu koopera ho Polísia Nasionál Timor-Leste (PNTL) atu fó mós espasu ba membru sira partisipa iha formasaun profisionál hodi bele prepara sira bá futuru atu dezenvolve instituisaun seguransa ne’e.
“Ida ne’e ita-nia planu no agora tama ona iha esbosu. Espera katak tempu besik ita sei halo kooperasaun ho Komandu PNTL atu diskute asuntu ne’e”, realsa.
Notísia relevante: SNFP Becora forma joven 230-resin iha área oioin
Jornalista: Tomé Amado
Editora: Maria Auxiliadora
