DILI, 11 maiu 2023 (TATOLI) – Partidu Liberta Povu Aileba (PLPA) kompromete sei fó insesivu ba Grupu Arte Marsiais (GAM) hadi harii kooperativa atu hadi’a joven nia moris.
“Iha aspetu ekonomia, ita sei fó insentivu ba GAM sira atu kria kooperativa rasik. Entaun GAM ne’ebé mak organizadu, Governu sei fó apoiu ba sira liuhusi intensivu para sira bele kria ativiadade ekonomia iha rai-laran,” Vise Sekretáriu Jerál PLPA, João Paulo Adito Pereira hato’o durante kampaña dialógu, iha suku Tokoluli, postu adminsitrativu Railako, munisípiu Ermera, kinta ne’e.
Nia dehan, apoiu GAM harii kooperativa sei ajuda dezenvolve sira-nia ekonomia família hodi lori moris di’ak ba ema hotu.
“Ita tenke ajuda GAM sira liuhusi atividade ekonomia atu sira bele ajuda mós governu aselera prosesu dezenvolvimentu ekonomia iha rai-laran,” João akresenta.
Notísia relevante:PLPA kompromete sei halakon lei pensaun vitalísia
Nia garante, se bainhira PLPA kaer governu, buat ne’ebé Estadu tenke halo ba joven sira mak hanesan estabelese kooperativa oi-oin iha área agrikultura, ortikultura, turizmu komunitária, kulinária no seluktan.
“Se GAM dezenvolve kooperativa ho di’ak, Governu bele aumenta tan asaun (saham) para dezenvolve di’ak liu kooperativa sira nian hodi rekupera ita-nia ekonomia ne’ebé mak tuun ba bebeik,” João salienta.
Nia akresenta, atu haburas kooperativa sira ne’e, governu tenke kontinua tau matan no kontrola para koperativa sira bele susesu.
“Kuperativa sei ajuda hasa’e rendimentu família, rendimentu grupu, rendimentu nasaun no ikus mai expande ba rai seluk,” João tenik.
Simpatezante no militante PLPA 50 resin mak partisipa iha kampaña eleitoral refere.
Notísia relevante:PLPA sei prezerva lisan no uzu-kustume Timor
Jornalista: Filomeno Martins
Editora: Nelia Borges
