LAUTÉM, 11 maiu 2023 (TATOLI)- Diretór Interinu, Servisu Agrikultura Munisípiu (SAM) Lautém, Manuel Madeira Savio, informa SAM-Lautém menus ekipamentu hanesan tratór hodi halo to’os no natar.
Diretór ne’e haktuir, ho difikuldade ida ne’e maka, produtu lokál iha Munisípiu Lautém menus bebeik iha kada tinan.
“SAM nia estimasaun kada tinan hakarak fila rai ho 1000 ektar liu, maibé ida ne’e ita la atinji tanba menus fasilidade tratór. Nune’e kada tinan ita fila de’it rai to’o 583 ektar, ho ida ne’e afeta maka’as ba kuantidade produsaun ai-han lokál iha Munisípiu Lautém,” Manuel Madeira Savio ba Agência Tatoli iha nia knar fatin Kartini I Lospalos, kinta ne,e.
Dirijente ne’e esplika, suku 34 iha Lautém maioria komunidade sira iha to’os no natar ne’ebé hakarak fila rai hodi kuda hare no batar, maibé tanba menus fasilidade hanesan trator, poténsia rai agrikultura barak mak abandona ona iha Munisípiu Lautem.
“Tinan 10 liubá ita iha trator hamutuk 40 ne’ebé fasilita husi Ministériu Agrikutura no Peskas (MAP), maibé tratór hirak ne’e aat hotu ona no hela de’it tratór 13 maka di’ak, maibé ne’e mós kondisaun ladun setavél tanba ne’e ita jere hodi fila komunidade nia natar no toos labele kobre hotu,” nia esplika.
Ho difikuldade ne’ebé SMA-Lautém enfrenta, Dirijente ne’e rekomenda ba Governu liuhosi MAP, hodi aloka orsamentu ne’ebé sufisiente nune’e halo manutensaun ba tratór sira ne’e.
“Servisu Agrikultura Lautém, rekomenda ba MAP hodi aloka orsamentu ne’ebé sufisiénte ba SMA – Lautem atu bele halo manutensaun ba tratór sira ne’ebé avaria ona no presiza tratór foun atu nune’e bele hasa’e produtu ai-han lokál iha Timor – Leste,” nia rekomenda.
Jornalista: Camilio de Sousa
Editora : Nelia Borges
