PNTL la rejista kazu durante kampaña eleitorál iha Oé-Cusse
OÉ-CUSSE 12 maiu 2023 (TATOLI) – Komandante Polísia Nasionál Timor-Leste (PNTL), Superintendente Xefe Polísia, Mateus Assunção Mendes, informa, durante kampaña eleitorál iha Rejiaun Administrativa Espesiál Oé-Cusse Ambeno (RAEOA), hahú loron 19 abríl to’o maiu ne’e, la rejista kazu ruma.
Notísia relevante: Kampaña FRETILIN iha Oésilo, CNE-PNTL ‘kaer-toman’ funsionáriu ida uza patrimóniu Estadu
Mateus Mendes hatete, partidu sira-ne’ebé maka durante halo kampaña iha Oé-Cusse, PNTL komesa hosi komandu rejionál to’o eskuadra sub-rejiaun sira no Ofisiál Polísia Suku (OPS) sira mós akompaña kaléndariu kampaña, tantu nasionál no rejionál, ne’ebé sira hotu-hotu, tau seguransa ba iha kampaña hotu ne’ebé mak la’o iha Oé-Cusse.
“Entaun relatóriu hotu-hotu dezde abertura kampaña iha loron 19 abríl, to’o fulan-maiu ne’e, seidauk iha problema ruma akontese, signifika partidu hotu-hotu, la’o ho situasaun hakmatek, iha partidu KHUNTO, PUDD PD no FRETILIN iha militante barak, maibé situasaun la’o di’ak laiha problema atake malu,” Mateus Assunção Mendes, ko’alia iha Oé-Cusse.
Notísia relevante: CNE rejista keixa rua durante kampaña eleitorál iha Oé-Cusse
Komandante PNTL mós felisita povu Oé-Cusse, tanba kontribui ona seguransa iha períodu kampaña eleitorál, nune’e nia espera bele kria pás-estabilidade to’o loron eleisaun.
“Ita só rejista de’it mak akontese iha suku Usitaku, ema deskoñesidu sunu bandeira partidu CNRT nian, ne’ebé agora ita-nia membru sira kontinua buka autór ne’e hodi koopera ho parte justisa, maibé kona-bá situasaun ein-jerál iha Oé-Cusse la’o di’ak,” nia orgullu.
Notísia relevante: PNTL Oé-Cusse buka-tuir autór sunu bendeira CNRT iha Nítibe
Joranlista: Abílio Elo Nini
Editór: Evaristo Soares Martins
