DILI, 15 maiu 2023 (TATOLI)—Partidu Congresso Nacional de Reconstrução Timorense (CNRT) hato’o ona keixa ba Ministéiru Públiku (MP) ligadu ho deklarasaun sidadaun Indonézia na’in-rua ne’ebé asesu kartaun eleitorál iha Bobonaro.
Notísia Relevante: KHUNTO keixa polémika sidadaun Indonézia asesu kartaun eleitorál iha Bobonaro
“CNRT nu’udar partidu halo ona keixa hatama ona iha Ministériu Públiku hodi MP hala’o nia serbisu investigasaun, sé mak utiliza dalan ilegál atu fasilita ema tama no utiliza símbolu Estadu nian ne’e krime hasoru Estadu,” Vise Bankada CNRT, Patrocínio Fernandes, hateten ba jornalista sira liuhosi konferénsia imprensa iha sala bankada CNRT iha PN, segunda ne’e.
Keixa ne’e hafoin loron ida tiha iha deklarasaun iha komísiu partidu CNRT nian iha Bobonaro partidu hatama kedas keixa ba MP, no keixa ne’e hasoru autór sira-ne’ebé deskonfia fasilita kartaun elitorál ho pasaporte ba sidadaun Indonézia sira.
“Dadus aprezenta iha keixa ne’e mak hanesan ita hotu akompaña iha komísiu sidadaun na’in-rua ne’ebé sai benefisiáriu publikamente deklara hateten, sira hetan kartaun eleitorál to’o eleisaun atu mai vota ba partidu KHUNTO, nune’e baze ida-ne’e mak CNRT kaer hodi halo keixa, ne’ebé agora ita husik setór justisa halo nia serbisu prosesu investigasaun hodi bele hatene loos ka loos,” nia dehan.
Notísia Relevante: CNRT-KHUNTO husu investiga sidadaun Indonézia ne’ebé asesu kartaun eleitorál iha Bobonaro
Jornalista : Nelson de Sousa
Editór : Cancio Ximenes
