iklan

NASIONÁL, DEFEZA, HEADLINE

PR Horta inaugura Sentru Operasionál Marítima iha Komponente Navál

PR Horta inaugura Sentru Operasionál Marítima iha Komponente Navál

Prezidente Repúblika, José Ramos Horta hamutuk ho Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente- Jenerál Falur Rate Laek no Komandante Komponente Navál, Capitão mar e Guerra, Higino das Neves partisipa iha serimónia inaugurasaun COMAR, iha Komponente Naval, Hera, segunda (15/05/2023). Imajen Tatoli/Egas Cristóvão

DILI, 15 maiu 2023 (TATOLI)–Prezidente Repúblika (PR), José Ramos Horta, akompaña hosi Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, inaugura Sentru Operasaun Marítima (COMAR, sigla portugés), ne’ebé lokaliza iha Komponente Navál, Hera.

“Sentru ne’e importante tebes no dispesável atu reforsa ita-nia vijilánsia marítima. Ha’u admira desde tinan 2000 ita-nia parseiru balun la konkorda Timor-Leste atu harii Komponenne Navál, maibé daudaun ne’e iha ona membru F-FDTL Komponente Navál hamutuk 800-resin ho área espesialidade oin-oin, ho formasaun tékniku superiór,” PR Horta hateten hafoin inaugura COMAR, iha Komponente Navál, segunda ne’e.

Prezidente Repúblika, José Ramos Horta. Imajen Tatoli/Egas Cristóvão

Governu planeia harii portu foun ba Komponente Navál, nune’e aumenta tan fiskalizasaun máritima.

“Loos duni labele rezolve 100% hanesan halakon peska ilegál maibé pelu menus sentru ne’e funsiona hanesan deterrence atu ema la tama arbiru, sé sira la halo fiskalizasaun marítima no aérea entaun ema avontade loos, sé sira haree Timor iha ekipamentu no iha meiu ne’e sira komesa tama mai territóriu Timor halo atividade ilegál,” nia akresenta.

Nune’e, Komandante Supremu Forsa Armada ne’e hato’o parabéns ba líder F-FDTL no iha tempu hanesan husu tau-matan didi’ak ho seriedade ba manutensaun.

“Ida-ne’e tenke di’ak no 100%, laiha instituisaun ne’ebé bele funsiona di’ak se laiha manutensaun didi’ak,” Horta tenik.

Notísia relevante : PR konsidera presiza kria kondisaun di’ak ba Komponente Navál hodi asegura tasi

Iha biban hanesan, Enkarregadu Negósiu Austrália, Caitlin Wilson, relata, sentru ne’e reabilita hosi Programa Kooperasaun Defeza Austrália (DPC, sigla inglés).

“COMAR hanesan uma operasionál ba Autoridade Marítima Nasionál Timor-Leste. Fasilidade refere fornese kapasidade di’ak ba Timor-Leste hodi monitoriza nia zona ekonomia eskluzivu, identifika ameasa no responde ba insidente buska inklui salvamentu iha tasi,” Caitlin Wilson realsa.

Aleinde ne’e, COMAR nu’udar multi ajénsia ne’ebé sei ajuda responde ba ameasa seguransa, peska ilegál no apoiu prevensaun ba piratária, tráfiku ema no tráfiku droga iha tasi.

“Kapasidade marítima ida forte liu sei ajuda proteje Timor-Leste nia rekursu naturál sira no apoia diversifikasaun ekonómiku. COMAR sei reforsa liután bainhira F-FDTL nia ró patrulla Guardian Class rua ne’ebé oferese hosi Austrália no aviaun Cessna oferese hosi Estadu Unidu Amérika (EUA) mai Timor-Leste,” nia reforsa.

Komandante Komponente Navál, Capitão de Mar e Guerra, Higino das Neves. Imajen Tatoli/Egas Cristóvão

Nune’e mós, Komandante Komponente Navál, Capitão de Mar e Guerra, Higino das Neves, sente orgullu ba inisiativa ne’e.

“Sentru ne’e antigu maibé iha dezembru 2022 ha’u koordena ho DPC ne’ebé sira halo reabilitasaun, inklui ho fasilidade sira iha sentru ne’e ninia laran. Sentru ne’e sei akumula funsionáriu hosi liña ministeriál sira hodi hala’o serbisu iha sentru refere hodi hamutuk ho Komponente Navál hodi akompaña situasaun iha tasi durante 24 oras,” Komandante Navál deskreve.

Liña ministériu ne’ebé sei destaka ninia pesoál sira iha sentru ne’e maka Ministériu Agrikultura no Peska, Ministériu Petróleu no Minerál, Ministériu Transporte no Komunikasaun, Polísia Nasionál Timor-Leste, no Unidade Polísia Marítima.

“Ami hotu sei serbisu iha sentru ne’e hodi akompaña situasaun iha tasi no sentru ne’e maka halo planu operasaun, seguransa no defeza ho ró hodi halo fiskalizasaun iha tasi. Hosi sentru ne’e bele haree situasaun balun hanesan ita-nia ema monu iha tasi fasilmente ita ajuda, peska ilegál ruma ita bele interven, tráfiku droga no ema iha tasi ita bele halo intervensaun lalais,” nia salienta.

Benefísiu hosi sentru ne’e maka iha ona kapasidade hodi monitoriza tasi no situasaun saida de’it durante 24 oras.

Sistema ne’ebé uza maka hanesan Traffic Monitoring System, ne’ebé antes ne’e apoia hosi Austrália no seluk, iha Sky Lite oferse hosi empreza amerikanu maibé serbisu iha Singapura.

“Timor-Leste iha ona ofisiál ida tuir formasaun ba ida-ne’e para bele maneja sistema sira ne’e,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!