Xanana promete fila-hikas ba Palásiu Governu no desentraliza podér ba munisípiu
BATUGADE, 15 maiu 2023 (TATOLI) – Programa prinsipál hosi Partidu Kongresu Nasionál Rekonstrusaun Timorense (CNRT) sei desentraliza podér ba munisípiu no Kayrala Xanana Gusmão sei fila-hikas ba Palásiu Governu nu’udar Primeiru Ministru (PM) iha governasaun foun.
Maibé Kay Rala Xanana Gusmão husu povu tomak atu fó votu maioria absoluta ba partidu CNRT ho númeru 12 iha loron 21 maiu 2023.
“Ha’u katuas ona, iha maiu halo 77 anos, maibé bainhira 21 maiu imi vota CNRT manán maka’as, fó podér mai ha’u simu nu’udar sidadaun ida atu sai Primeiru Ministru hodi serbí ba povu no nasaun, no salva tiha ita-nia estadu direitu demokrátiku,” Xanana Gusmão hato’o kompromisu ne’e liuhosi atividade kampaña eleitorál ho tipu mini-kampaña, ne’ebé hala’o iha Nú-Badak, suku Batugade, postu administrativu Balibo, munisípiu Bobonaro.
Bainhira Povu fó fiar ba tuur fali iha Palásiu Governu, nu’udar Xefe Governu mak sei tún fila-fali ba munisípiu idak-idak atu tuur hamutuk ho deputadu munisipál sira hodi diskute planu ne’ebé di’ak atu rezolve preokupasaun povu iha setór agrikultura, pekuária, peska, turizmu hodi dezenvolve ekonomia lokál.
Bainhira implementa podér lokál no desentralizasaun administrativa, Bobonaro nia oan ida sei lidera governu lokál no deputadu na’in-neen kada postu administrativu atubele lori aspirasaun povu nia ba diskute iha parlamentu munisipál hodi solusiona problema iha baze.
Notísia relevante: CNRT sei tau atensaun ba ferik-katuas no ema ho defisiénsia
Maibé atu konkretiza programa hirak-ne’e, Xanana Gusmão husu Bobonaro-oan atu fó votu na CNRT manán iha eleisaun parlamentár, 21 maiu tinan 2023.
Hakarak relembra ba kotuk katak, iha loron 14 abríl 2002 Kay Rala Xanana Gusmão eleitu nu’udar Prezidente Repúblika no to’o fulan-maiu 2007.
Hafoin husik prezidénsia, Kay Rala Xanana Gusmão eleitu nu’udar Prezidente partidu polítiku ne’ebé formadu iha iha abríl 2007 ‘Congresso Nacional para a Reconstrução de Timor-Leste’.
Nune’e iha 30 juñu realiza eleisaun lejizlativa, partidu CNRT hetan votu barakliu daruak no forma aliansa ho Partidu Demokrátiku (PD) no koligasaun ASDT-PSD. Iha tempu ne’ebá hanaran Aliansa Maoria Parlamentár (AMP) ho kadeira 37 hosi asentu 65 iha Parlamentu Nasionál.
Iha loron 03 agostu 2007, Prezidente RepúbliKa José Ramos-Horta ofisialmente konvida AMP hodi forma Governu.
Loron 08 fulan-agostu 2007, iha Palásiu Nobre Lahane, Dili, toma pose ba IV Governu Konstitusionál, lideradu Kay Rala Xanana Gusmão, nu’udar Primeiru-Ministru. Mandatu IV Governu termina iha 2012.
Iha loron 07 jullu 2012, iha eleisaun lejizlativa, CNRT hetan númeru votu barak-liu, garantia ho kadeira 30 hosi deputadu na’in-65 iha Parlamentu Nasionál. Nune’e CNRT forma koligasaun ho PD no Frente-Mudança, no forsa polítiku hosi koligasaun ne’e iha Parlamentu Nasionál ho akdeira 40.
Prezidente Repúblika, taur Matan Ruak konvida koligasaun ne’e hodi forma Governu V Governu Konstitusionál ne’ebé simu pose iha loron 08 fulan-agostu 2012, nune’e Xanana Gusmão nu’udar Prmeiru-Ministru no Ministru Defeza no Seguransa.
Iha fulan-janeiru 2015, Xanana Gusmão anunsia rejigna hosi kargu Primeiru-Ministu no kuadru FRETILIN, Rui Maria de Araújo lidera VI Governu Konstitusionál iha 2016, no Xanana Gusmão nu’udar Ministru Planeamentu no Investimentu Estratéjiku (MPIE).
Notísia relevante: Xanana kompromete: CNRT manán sei halo auditoria servisu Governu atuál
Jornalista : Sérgio da Cruz
Editór : Evaristo Soares Martins
