OÉ-CUSSE 16 maiu 2023 (TATOLI) – Primeiru Ministru (PM), Taur Matan Ruak, felisita Autoridade Rejiaun Administrativa Espesiál Oé-cusse Ambeno (RAEAO) ne’ebé hatuur fatuk dahuluk ba projetu estrada nasionál ho kilómetru 18 hosi eis merkadu Tono, suku Cunha to’o fronteira Napan, suku Bobometo, sub-rejiaun Oésilo, maibé labele partisipa tanba ba Oé-Cusse ho misaun kampaña eleitorál.
Notísia relevante: Autoridade RAEOA hatuur fatuk dahuluk ba projetu estrada Pante Makasar-Oésilo
Mensajen Xefe Governu nian ne’e, hato’o liuhosi Prezidente Autoridade RAEOA, Arsénio Paixão Bano, iha ámbitu serimónia hatuur fatuk dahuluk ba projetu estrada Tono ba Oésilo, iha aldeia Oébaha, suku Bobometo.
“Hanesan Prezidente Autoridade, hakarak agradese ba Primeiru Ministru, Taur Matan Ruak, maibé Primeiru Ministru, hato’o mensajén mai ha’u, dehan nia felisita no fó parabéns ba RAEOA, tanba ita halo avansu ida tán, lansa estrada nasionál Tono, Oésilo, tanba tinan kotuk ita lansa estrada nasionál Pante Makasar ba Nítibe,” Arsénio Paixão Bano, haktuir mensajen Xefe Governu iha aldeia Oébaha, Oé-Cusse, tersa ne’e.
Bazea ba ajenda Autoridade RAEOA katak, serimónia lansamentu ba projetu estrada nasionál ne’e, loloos lansa direita hosi Primeiru Ministru, maibé Primeiru Ministru mai Oé-Cusse, ho misaun atividade kampaña eleitorál.
“Tuir loloos serimónia ohin, lansa direita hosi Primeiru Ministru hamutuk ho ita iha fatin ne’e, maibé ohin ha’u husu disponibilidade, nia labele marka prezensa, maibé hato’o de’it komprimentus de’it ba ita, dehan nia labele hamutuk ho ita atu halo lansamentu ba projetu estrada nasionál Tono, Oésilo, tanba nia mai Oé-Cusse mai ho misaun kampaña ninian,” nia katak.
Notísia relevante: PM Taur husik hela mensajen rua ba povu Oé-Cusse
Jornalista: Abílio Elo Nini
Editór: Evaristo Soares Martins
