OÉ-CUSSE 17 maiu 2023 (TATOLI) – Konstrusaun projetu terminál ba transporte públiku ne’ebé konstrui iha eis merkadu Tono, Rejiaun Administrativa Espesial Oé-cusse Ambeno (RAEOA) daudaun ne’e nia progresu fíziku atinje ona pusentu 46,62.
Projetu terminál Tono ne’e lokaliza iha eis merkadu Tono, aldeia Noeninen, suku Cunha, sub-rejiaun Pante Makasar.
Notísia relevante: Autoridade RAEOA xamada kompañia Grand Enclave ba projetu terminál Tono
Prezidente Autoridade RAEOA, Arsénio Paixão Bano, informa, projetu ne’e konstrui iha tinan 2022, tuir loloos konklui ona tanba durasaun kontratu fulan-haat, maibé implementasaun la’o atrazu tanba impaktu udan, nune’e projetu ne’e foin hahú fali hafoin udan-been menus.
“Tán ne’e mak horisehik, ha’u ba ho tékniku sira halo fiskalizasaun atu hatene, obra ne’e nia progresu la’o oinsá, iha observa katak, atinje ona 46,62%, entaun ita enkoraja kompañia hodi bele aselera tán servisu servisu balu, tanba iha haree servisu fíziku kuaze hotu ona,” Arsénio Paixão Bano, ko’alia iha Oé-Cusse, kuarta ne’e.
Ezekutivu ne’e, informa, projetu terminál Tono ho modelu lokál, atu akumula transporte públiku no privada, ne’ebé mai hosi parte súl, hosi sub-rejiaun Oésilo, Pássabe inklui Pante Makasar balu.
“Terminál ne’e importante ba RAEOA, nia objetivu ne’e atu fasilita movimentu transporte públiku sira, liuliu transporte terrestre, tanba agora númeru movimentu transporte iha Oé-Cusse aumenta beibeik, entaun Autoridade diside kontrui terminál ida iha-ne’ebá, atu sira bele kumpre disiplina,” nia afirma.
Tanba durante ne’e Autoridade rona no simu preokupasaun hosi transporte sira, iha problema entre angguna no mikrolete, balu mai hosi foho tama liu sidade, entaun ita kria fatin ne’e bele fahe pasajeiru, ba angguna, sira bele to’o de’it iha terminál ne’e, depois mikrolete sira mak kontinua halo operasaun tama to’o vila.
“Projetu ita halo tanba iha mós ligasaun ho projetu nasionál estrada ligasaun Pante Makasar ba Oésilo, ne’e maka horisehik ita lansa ona, ba futuru fasilita di’akliu tán ita-nia transporte,” nia katak.
Entretantu, projetu terminál ba transporte públiku ne’e ezekuta hosi kompañia Grand Enklave, Unipesoál Lda hahú iha tinan 2022, ho valór kontratu $226,017.38, osan ne’e Autoridade aloka hosi Orsamentu Jerál Estadu (OJE) 2022 ho durasaun serbisu durante fulan-haat.
Notísia relevante: RAEOA prevee rihun $226-resin ba terminál transporte públiku iha Tono
Jornalista: Abílio Elo Nini
Editór: Evaristo Soares Martins
