PNTL Oé-Cusse la tolera grupu-individu prátika krime iha sentru votasaun

OÉ-CUSSE, 20 maiu 2023 (TATOLI) – Komandante Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), Superintendente Xefe, Mateus Assunção Mendes, informa, parte seguransa sei la tolera grupu ka individu tenta prátika aktu krime hodi pertuba prosesu votasaun iha sentru votasaun.

Notísia relevante: STAE Oé-Cusse hato’o mensajen prinsipál haat iha distribuisaun materiál eleisaun

Mateus Assunção Mendes, hatete, daudaun ne’e  membru efetivu iha RAEOA la sufisiente atu kobre sentru votasaun 80, no estasaun votu 115 iha territóriu Oé-Cusse,nune’e komandu husu apoiu komandu jerál, disponibiliza efetivu na’in-40 hosi Polísia Unidade Fronteira (UPF).

“Ita-nia membru la sufisiente, maibé seguransa sei la tolera sidadaun, individu ka grupu ida karik tenta atu prátika atu halo aktu krime hodi perturba iha sentru votasaun, ne’e ami sei la tolera, tanba eleisaun ne’e ba Timor-Leste, hakarak la’o ho susesu,” Mateus Assunção Mendes, ko’alia iha ámbitu serimónia distribuisaun materiál eleisaun iha salaun Alfándega, Oé-Cusse, sábadu ne’e.

Notísia relevante: PNTL Oé-Cusse buka-tuir autór sunu bendeira CNRT iha Nítibe

Komandante PNTL Oé-Cusse, orienta membru sira, tenke servisu ho disiplina, hatudu profisionalidade iha povu nia leet, garante seguransa iha sentru votasaun sira, no labele envolve iha partidu polítiku, maibé serbisu bazea de’it misaun no vizaun instituisaun PNTL nian.

“Ita-ne’e seguransa, serbisu tuir ita-nia misaun no visaun instituisaun PNTL nian, laiha membru ida iha partidu polítiku, espera ita-nia eleisaun sei la’o di’ak, tanba ita-nia komunidade sira mós komprende ona, saida mak eleisaun, ne’e husu nafatin kooperasaun ho entidade hotu, atu eleisaun ne’e bele la’o pás-estabilidade,” nia afirma.

Notísia relevante:PNTL la rejista kazu durante kampaña eleitorál iha Oé-Cusse

Komandante PNTL ne’e apela ba membru destakadu PNTL iha sentru votasaun presiza promove komunikasaun ho órgaun eleitorál sira, brigadista no CNE, nune’e bele fó susesu iha idak-idak nia sentru votasaun ne’ebé hala’o serbisu bá.

Mensajen ikus ba membru PNTL ne’ebé destakadu iha sentru votasaun, hanesan lei hatete, seguransa ne’e imparsiál, neutrál, komandu lakohi rona ita-boot sira, hatudu ita-nia sinál balu, iha sentru votasaun, katak ita-boot sira-nia sentimentu liu iha partidu ida.

“Ne’e labele akontese, kuandu ita PNTL halo ida-ne’e, nai-ulun sira ho povu la fiar ona ita, tenki sai imparsiál no neutral iha buat hotu, labele halís ba partidu ida,” nia fó hanoin.

Notísia relevante: PNTL Oé-Cusse preparadu asegura kampaña no eleisaun parlamentár

Jornalista: Abílio Elo Nini

Editór: Evaristo Soares Martins