OÉ-CUSSE 20 maiu 2023 (TATOLI) – Diretora Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), Luiza da Costa, hato’o mensajén prinsipál haat iha ámbitu serimónia distribuisaun materiál sensitivu no la’ós-sensitivu iha salaun apuramentu Alfándega, Palaban, Oé-Cusse, sábadu ne’e.
Notísia relevante: STAE Oé-Cusse prepara viatura 50 tula materiál ba sentru votasaun 80
Diretora STAE Oé-Cusse, Luiza da Costa, esplika, hanesan responsavél másimu orgaun eleitorál iha Oé-Cusse, iha esperansa ofisiál eleitorál sira iha territóriu Oé-Cusse, atu serbisu ho transparánsia no imparsialidade, nune’e bele prodús rezultadu ne’ebé kredivel, no hetan konfiansa hosi públiku.
“Primeiru, ha’u-nia apela ba brigadista 80, husu ba ita-boot sira, atu tau matan no kontrola nafatin materiál eleisaun ne’ebé distribui, hodi to’o fatin destinadu ho di’ak, no aban dadeer hahú prosesu votasaun kontajen inisiál bele realiza ho di’ak no susesu, no lori rezultadu di’ak mai iha apuramentu rejiaun,” Luiza da Costa, ko’alia iha ámbitu distribuisaun materiál eleisaun iha salaun Apuramentu Alfandega Palaban.
Daruak, apela nafatin ba parte seguransa PNTL, atu kontinua akompaña nafatin, materiál eleisaun ne’ebé, ohin hahú distribui ona ba sentru votasaun idak-idak iha territóriu Oé-Cusse, bele asegura to’o fatin sentru votasaun, no fila-fali mai halo apuramentu iha rejiaun ho situasaun estavel.
Datoluk, husu ofisiál supervizaun eleitorál sira, hosi CNE, atu akompaña no halo supervizaun ba materiál eleisaun iha sentru votasaun idak-idak, no ba prosesu hahú votasaun to’o transporta materiál eleisaun mai fali apuramentu rejiaun.
Ikusliu husu ba fiskál partidu polítiku sira, atu halo fiskalizasaun hahú hosi operasaun votasaun kontajen votu iha sentru votasaun, tanba partisipasaun iha sentru votasaun ne’e importante tebes.
Nune’e mós ba observadór nasionál no internasionál husu atu kontinua observa ba lala’ok eleitorál tomak, ba mídia sira no órgaun komunikasaun sosiál tomak, presiza halo kobertura neutralidade iha prosesu eleitorál tuir ita-boot sira-nia kna’ar.
Notísia relevante: Autoridade simu ona pedidu STAE atu hadi’a sentru votasaun iha Oe-Cusse
Distribuisaun materiál ba eleisaun ne’e, abertura diretamente hosi Adjuntu Prezidente Autoridade RAEOA, Maximianu Neno, konfirma katak, Autoridade prepara ona infraestrutura bázika ba, normalizasaun estrada hosi kapitál Oé-Cusse, to’o fatin sentru votasaun sira iha suku 18, liuliu bee-moos, eletrisidade atu garantia ba prosesu eleisaun ne’e bele la’o ho susesu.
Nune’e nia husu, autoridade komunitáriu hamutuk hdo lidér partidu polítiku sira iha suku presiza koordenasaun ho parte órgaun eleitorál sira hamutuk ho PNTL, atubele asegura fó susesu ba iha eleisaun.
“Ohin ita entrega urna votu, ha’u esperu ita hotu serbisu ho profisionál atu asegura buat hotu la’o di’ak, presiza profisionál nune’e labele iha dezentendimentu, ha’u fiar katak sei liaha akontese problema, tanba ita liu ona esperiénsia tinan barak ona halo eleisaun, ema hotu intende ho prosesu eleisaun ne’e, ita tenta nafatin atu minimiza risku,” Maximianu Neno hateten.
Diretór CNE Oé-Cusse, Tomás Oqui Meta, konsidera serimónia distribuisaun ho objetivu, atu ezersie nia direitu votu, iha sentru votasaun hotu-hotu, instuisaun tolu importante atu hametin koordenasaun hanesan CNE, STAE no PNTL.
“Instituisaun tolu ne’e maka responsável másimu, maske diferente, maibé ita-nia misaun ne’e ida de’it, STAE mak halo preparasaun téknika, PNTL fó seguransa no CNE mak halo supervizaun,” nia katak.
Entretantu, totál ofisiál eleitorál iha Oé-Cusse hamutuk na’in-1.150 hodi destaka iha sentru votasaun 80 no estasaun votasaun 115 estabelese ona iha territóriu Oé-Cusse.
Ho totál eleitór elijível atu partisipa eleisaun iha loron 21 fulan maiu tinan 2023 hamutuk 54.291, mane 27.681 no feto 26.610.
Notísia relevante: Eleitór Oé-Cusse 54.291 elijível vota iha eleisaun parlamentár
Jornalista: Abílio Elo Nini
Editór: Evaristo Soares Martins
