DILI, 21 maiu 2023 (TATOLI)- Diretór Sekretaridu Tékniku Administrasaun Eleitorál (STAE), Acelino Manuel Branco, rejeita informasaun ne’ebé espalla iha públiku katak tinta indelevél ba Eleisaun Parlamentár (ElPar) tinan 2023 ne’ebé STAE utiliza laiha kualidade.
“Ha’u tuun iha terrenu hodi observa direita situasaun sira ne’e, ami nia posizaun mak ne’e, ha’u halo konfirmasaun ba munisípiu hotu-hotu afinál das konstas informasaun ne’e laloos,” Acelino hateten ba jornalista sira bainhira halo obeservasaun iha sentru votasaun ne’ebé estabelese iha Eskola Bázika Filial (EBF), Faról Dili, ohin.
Notísia Relevante :Xanana kestiona kualidade tinta indelevél ba ElPar 2023
Iha fulan-rua liubá, Nia klarifika, orgaun eleitorál STAE no CNE hamutuk ho partidu polítiku sira halo ona teste ba tinta ne’e no hetan ona aseitasaun hodi prodúz tinta ne’e atubele uza iha eleisaun parlamentár 2023 ne’ebé realiza iha loron 21 fulan-maiu ohin.
“Ita hatene katak tinta ne’e liuhosi prosesu ida ne’ebé mak naruk, ita halo teste dala rua hamutuk ho partidu polítiku sira hotu-hotu, no hotu-hotu konkorda ninian kualidade tinta ne’ebé mak ita foin haruka bá munsipiu,” Acelino Manuel informa.
Nia esplika tinta ne’ebé STAE uza ba eleisaun parlamentár ne’e kualidade tanba importadu hosi nasaun Denmark ho padraun internasionál, maibé kona-ba preokupasaun ne’ebé mosu iha públiku ne’e akontese karik tanba ofisiál sira utiliza tinta la kumpre tuir instrusaun ne’ebé maka iha nune’e mosu fallansu tékniku iha terrenu.
“Ita bo’ot sira haree ha’u perkore sentru votasaun sira hotu-hotu la komprova, hanesan mós informasaun hosi sentru sira balun,” Nia dehan.
Maibé Diretór ne’e, hateten nia parte simu duni informasaun balun hosi sentru votasaun ida iha munisípiu Manufahi ne’ebé hateten tinta laiha kualidade, maibé depois orienta kedas Diretór STAE munisípiu to’o iha fatin akontesimentu hodi verifika deskobre katak informasaun ne’e laloos.
“Hau rejeita totálmente tanba tinta ne’e kualidade hotu hotu konkorda ho tinta ne’e mak sosa hodi uza ba eleisaun nega, ne’ebé lalaos,” Diretór Sekretaridu Tékniku Administrasaun Eleitorál (STAE), Acelino Manuel Branco afirma.
Notísia Relevante :Tinta butir entre 10.500-12.500 sei to’o TL iha abríl
Jornalista: Natalino Costa
Editór : Agapito dos Santos
