DILI, 23 maiu 2023 (TATOLI) – Xefe Departamentu Psikataria iha Hospitál Nasionál Guido Valaadres (HNGV), Boaventura Jose da Costa hateten durante fulan janeiru to’o marsu, paisente defisiénsia mentál ne’ebé halo tratamentu iha acute care hamutuk 69.
“Durante fulan janeiru to’o marsu pasiente mentál sira ne’ebé mak halo tratamentu iha ne’e hamutuk 69, husi ne’e maioria feto”, Boaventura Jose da Costa informa iha nia kna’ar fatin HNGV, ohin.
Nia esplika, pasiente ne’ebé durante halo tratamentu iha OPD mai to’o internamentu ka baixa iha acute care HNGV domina liu pasiente ho defisiénsia mentál no diagnosa esquizofrenia, depresaun no tenta hakarak oho an.
“kazu sira ne’e ita bele dehan katak falta koñesementu husi família no komunidade, ida ne’e problema familiar mak barak liu”, nia dehan.
Nia afirma, ho kazu sira ne’e família sira tenke toma atensaun tanba dalabarak akontese tanba falta komunikasaun sira.
“Balun seidauk to’o ospitál, ita rona husi media sosiál katak mate tiha ona, tanba falta komunikasaun familiar no edukasaun sívika ne’e sei menus entaun ita presiza fó edukasaun ba família sira ne’e, importante tebes tanba problema família mosu la rezolve iha família nia-laran, bele akontese tara an, oho an liuhosi hemu ai-moruk sira ne’e”, nia subliña.
“Durante ne’e iha nai’in hitu mak tenta oho an, liuliu feto sira tanba dadus ne’ebé hetan iha emerjénsia barak liu mak tenta hemu ai moruk, balun tau tali kakorok ne’e husi problema familiár sira de’it”, nia informa.
Husi pasiente sira ne’e maioria halo tratamentu iha fatin acute care, ne’e maioria idade joven sira mak akontese moras ida ne’e.
“Tratamentu ita iha ne’e utiliza liu tratamentu psikoterapia, depois ita haree kondisaun pasiente ninian, keta nia ho problema fíziku ruma tenta oho-an, konsumu buat ruma, ita tenke interkonsul ho parte medisina ho parte sirurjia hodi haree nia problema fíziku, bainhira nia hanoin ita tenke fo konselin ba nia depois mak halo tratamentu hodi haree liubá, se kazu ne’e ho depresaun entaun ita tenke fó tratamentu ho anti depresivu ba nia to’o rekupera”, nia hatutan.
Kona-ba medikamentu ekipamentu sira iha ospitál sufisiente hela hodi halo atendimentu ba pasiente sira ho defisiénsia mental.
Jornalista : Felicidade Ximenes
Editór : Zezito Silva
