DILI, 23 maiu 2023 (TATOLI)—Prezidente Partidu Congresso Nacional Reconstrução de Timorense(CNRT), Kayrala Xanana Gusmão, prefere hein desizaun finál Eleisaun Parlamentár 2023 hosi Komisaun Nasionál Eleisaun (CNE, sigla portugés) molok deklara formasaun Governu.
“Rezultadu la’ós ofisiál, ida-ne’e partidu nian, atu dehan de’it katak rezultadu ne’ebé sei publika hosi Sekretariadu Tékniku Administrasaun Eleitorál (STAE) no CNE labele kleuk tun kleuk sa’e. Tanba ne’e ko’alia kona-ba buat seluk ne’ebé sei akontese ita hein lai rezultadu, ne’ebé CNE fó sai tiha haruka ba Tribunál no desizaun ne’e publika iha Jornál Repúblika maka bele deside,” Xanana Gusmão, hateten liuhosi konferénsia imprensa ne’ebé hala’o iha sede partidu CNRT, Bairros dos Grilos, tersa ne’e.
Notísia relevante : Rezultadu kontajen finál iha STAE, CNRT hetan vitória iha Elpar 2023
Kuadru CNRT akompaña bebeik ho kuidadu rezultadu eleisaun ne’ebé fó sai hosi órgaun eleitorál, ne’ebé hatudu katak CNRT mak manán.
“Ita konta tun konta sa’e ita haree dehan CNRT iha 43%, maibé tuir sistema partidu kiik sira-nia ninia votu depois CNE mak sei haree oinsá, katak 43% ne’e konta ho partidu kiik sira ne’ebé la liu barreira, ne’ebé atu deklara de’it katak rezultadu ne’ebé ami iha la’ós falsu tanba ne’e hotu tuir akta ne’ebé asina iha sentru votasaun”, nia akresenta.
Prezidente partidu ne’e deklara mós katak CNRT sente kontente ho rezultadu eleisaun, ne’ebé hatudu katak povu fó fiar ba partidu ne’e.
Iha tersa (23/05) STAE fó sai rezultadu finál provizóriu kontajen votu Eleisaun Parlamentár 2023 hosi munisípiu sira inklui rai-li’ur, ho rezultadu finál hatudu CNRT hetan vitória ho votu 288.101 (41,62%) kadeira 31 iha Parlamentu Nasionál
Tuir rezultadu kontajen, votu maioria daruak mak Partidu Frente Revolucionária de Timor Leste Independente (FRETILIN) ho votu 178.248 (25,75%) kadeira 19, tuir mai Partidu Demokrátiku (PD) ho votu 64.493 (9,32%) kadeira neen, Partidu Kmanek Haburas Unidade Nasionál Timor-oan (KHUNTO) ho votu 52.021 (7,52%) kadeira lima no Partidu Libertasaun Populár (PLP) ho votu 40.696 (5,88%) kadeira haat.
Partidu os Verdes (PVT) 25,100 (3,63%), Partidu Unidade Dezenvolvimentu Demokrátiku (PUDD) 21.639 (3,13%), Partidu Asosiasaun Populár Monarkia Timorense (APMT) 6.678 (0,96%), Partidu Centro Ação Social Democrata Timor-Leste (CASDT) 3.169 (0,46%), Partidu Libertasaun Povu Aileba (PLPA) 3.272 (0,48%), Partidu Sosialista de Timor (PST) 2.415 (0,35%); Partidu Republikanu (PR) 1.558 (0,23%), Partidu Demokrata Cristão (PDC) 1.262 (0,18%).
Nune’e mós, Partidu Uniaun Demokrátiku Timorense (UDT) 1.256 (0,18%), Partidu Unidade Nasionál Demokrátiku Rezisténsia Timorense (UNDERTIM) 1.022 (0,15%), Partidu Dezenvolvimentu Nasionál (PDN) 597 (0,09%) no Partidu Movimentu Libertasaun Maubere (MLPM) 642 (0,09%).
Hosi rezultadu hirak ne’e, votu nulu 10.222, votu reklamadu 515, votu rejeitadu 58, votu branku 2.693, votu abandonadu 24 no votante ne’ebé vota ona hamutuk 795.583 (80,3%), hosi totál eleitór iha territóriu nasionál hamutuk 890.145.
Tuir planu, iha loron ne’e rezultadu finál ne’e sei submete ba CNE atu halo verifikasaun ba akta sira hosi kada munisípiu iha territóriu nasionál.
Jornalista : Antónia Gusmão
Editora : Julia Chatarina
