PNTL felisita povu Oé-Cusse kontribui pás-estabilidade iha eleisaun parlamentár
OÉ-CUSSE, 24 maiu 2023 (TATOLI) – Komandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), lideradu Superintendente Xefe, Mateus Assunção Mendes, agradese ba entidade sira liuliu povu Oé-Cusse, tanba kontribui ona hodi garante pás-estabilidade iha ámbitu kampaña eleitorál.
Notísia relevante: STAE Oé-Cusse transporta rezultadu apuramentu rejionál ba nasionál
Komandante PNTL Oé-Cusse, Superintendente Xefe Polísia, Mateus Assunção Mendes, esplika, festa demokrásia la’o di’ak iha Oé-Cusse, la’ós tanba parte ida nian maibé kontribuisaun ema hotu nian.
“Nune’e lori komandu PNTL nia naran, ha’u orgullu ba entidade hotu nia kontribuisaun hahú hosi kampaña, distribuisaun materiál ba sentru votasaun, loron eleisaun to’o ohin ita finaliza ona apuramentu rejionál, buat hotu la’o di’ak, seguransa estabilidade garantia tebes, ida-ne’e mak ita hotu nia hakarak,” Mateus Assunção Mendes ko’alia iha Oé-Cusse, molok transporta rezultadu apuramentu rejionál ba nasionál, tersa ne’e.
“Tan ne’e ha’u louva ita hotu-hotu nia hanoin di’ak no serbisu, ita espera katak atividade ne’e iha RAEOA, iha tempu ba tempu seluk, ita kontinua mantein situasaun ne’ebé pás kontribui hametin di’akliu tán unidade iha rai Oé-Cusse,” nia afirma.
Hanesan ajente seguránsa Oé-Cusse nian, kongratula povu Oé-Cusse, liuliu esforsu tomak, ne’ebé ita hotu presta ona, iha prosesu eleisaun parlamentár tinan ne’e, buat hotu la’o ho susesu, tanba hotu-hotu nia esforsu no kontribuisaun.
“Ita hotu-nia vontade di’ak, serbisu ho sakrifísiu, nune’e ita bele alkansa ita-nia rezultadu ida halo ema hotu kontente, ita la rai hela tristeza ba sé de’it, atu parte STAE no CNE ho seguransa, dala ida tán agradese boot ba ita hotu nia esforsu durante ne’e,” nia katak.
Notísia relevante: PNTL la rejista kazu durante kampaña eleitorál iha Oé-Cusse
Jornalista : Abílio Elo Nini
Editór : Evaristo Soares Martins
