OÉ-CUSSE 23 maiu 2023 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), tersa ne’e dezloka ona rezultadu apuramentu rejionál nian ba apuramentu nasionál, liuhosi transporte terrestre, fronteira Sakato-Wini, Indonézia iha tuku 11:00 dadeer ne’e.
Notísia relevante: CNRT manán iha Oé-Cusse ho votu 19,624
Akompaña dezlokasaun rezultadu apuramentu rejionál ne’e komposta hosi Komandante Polísia Nasionál Timor-Leste (PNTL) Oé-Cusse, Superintendente Xefe, Mateus Assunção Mendes, Diretór Komisaun Nasionál Eleisaun (CNE, sigla portugés) no ekipa tékniku hosi STAE.
“Ohin, dezlokasaun materiál kona-bá akta rezultadu finál RAEOA nian, ho akta orijinál rezultadu sentru votasaun no estasaun votasaun ho akta rezultadu eletrónika kada sentru votasaun atu lori ba apuramentu nasionál,” responsabél tékniku STAE Oé-Cusse, Gregorio do Santos Neno, informa ba jornalista sira iha salaun apuramentu Alfándega, Palaban.
Nia esplika, rezultadu apuramentu sira-ne’ebé lori ba nasionál hanesan, akta rezultadu finál apuramentu RAEOA nian ida (1), akta eletrónika sentru votasaun 80, akta orijinál sentru votasaun 80, akta orijinál estasaun votasaun 115 no mós boletín votu reklamadu 29.
“Akta rezultadu sira-ne’e ohin xave metin iha kaixa urna, xave sira iha tolu, xave sorin loos ho númeru 1830260, xave sorin karuk 1831830, xave kaixa leten 1831867,” nia afirma.
Entretantu, molok ekipa dezloka akta rezultadu apuramentu rejionál RAEOA nian, hetan koñesimentu liuhosi asinatura akta hosi fikál partidu polítiku sira.
Nune’e mós Komandante PNTL Oé-Cusse, Superintendente Xefe, Mateus Assunção Mendes, Diretora STAE Oé-Cusse, Luiza da Costa no Diretór CNE Oé-Cusse, Tomas Oqui Meta.
Ho totál eleitór elijível atu partisipa eleisaun iha loron 21 fulan-maiu tinan 2023 hamutuk 54.291, mane 27.681 no feto 26.610.
Notísia relevante: Durante eleisaun parlamentár iha Oé-Cusse, situasaun hakmatek no kontroladu
Jornalista : Abílio Elo Nini
Editór : Evaristo Soares Martins
