iklan

ELEISAUN, HEADLINE, MUNISÍPIU, OÉ-CUSSE (RAEOA), SEGURANSA

Durante eleisaun parlamentár iha Oé-Cusse, situasaun hakmatek no kontroladu

Durante eleisaun parlamentár iha Oé-Cusse, situasaun hakmatek no kontroladu

Komandante PNTL Oé-Cusse, Superintendente Xefe Polísia, Mateus Assunção Mendes. Imajen Tatoli/Abílio Elo Nini.

OÉ-CUSSE, 22 maiu 2023 (TATOLI) – Komandante Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), Superintendente Xefe Polísia, Mateus Assunção Mendes, informa durante Eleisaun Parlamentár situasaun iha Oé-Cusse Ambeno la’o hakmatek no kontroladu, tanba povu iha konsiénsia polítika kontribui iha prosesu tomak.

Notísia relevante: PNTL Oé-Cusse la tolera grupu-individu prátika krime iha sentru votasaun

Mateus Mendes,  hatete, maske membru efetivu PNTL iha rjiaun Oé-Cusse la sufisiente, maibé orgullu tanba komunidade iha konsiénsia hodi kontribui iha ámbitu loron eleisaun eleisaun to’o faze apuramentu rejionál.

“Komesa distribuisaun materiál ba iha sentru votasaun sira, to’o horisehik eleisaun hotu fila-fali iha apuramentu rejionál, ho situasaun hakmatek no  kontroladu, laiha insidente ruma rejistu iha eleisaun ne’e to’o prezente data,” Komandante Mateus Assunção Mendes, ko’alia ba jornalista sira iha salaun apuramentu Alfándega, Palaban, Oé-Cusse, segunda ne’e.

Dirijente PNTL Oé-Cusse, felisita no agradese ba komunidade iha territóriu Oé-Cusse, tanba koopera no kontribui iha pas-estabilidade durante eleisaun parlamentár.

“Ita-nia komunidade sira-ne’e iha konsiénsia polítika, ne’ebé sira mós halo tuir buat-ne’ebé ita fó-sai ba sira, katak seguransa iha ita hotu nia liman, ne’ebé hotu-hotu fiar, informasaun PNTL hato’o ona, nune’e situasaun dezde hahú to’o remata sempre la’o kontroladu,” nia afirma.

Nune’e nia apela, nafatin ba komunidade sira iha Oé-Cusse, kontribui ba seguransa estabilidade, no promove amizade bainhira iha rezultadu finál, karik partidu ne’ebé maka hetan votu maioria lidera Governu foun mai, hamutuk kria unidade hodi kontribui ba prosesu dezenvolvimentu.

Notísia relevante: PNTL la rejista kazu durante kampaña eleitorál iha Oé-Cusse

Entretantu, antes ne’e komandu PNTL Oé-Cusse, destaka efetivu sira hamutuk 135 aumenta ho efetivu na’in-40 hosi Polísia Unidade Fronteira (UPF) no na’in-10 hosi Polísia Unidade Espesiál  (UEP) hodi destaka iha sentru votasaun 80 no estasaun votasaun 115 iha territóriu Oé-Cusse,

Aliende ne’e mós no hetan apoia hosi FALINTIL-Forsa Defeza Timor-Leste (F-FDTL), Unidade Polísia Marrítima  (UPM) no Autoridade Protesaun Sivíl (APC, sigla portugés).

Agência Tatoli observa, prosesu apuramentu rejionál Oé-Cusse, hahú iha domingu, 21 maiu, tuku 9:00 kalan, to’o loron segunda, 22 maiu iha tuku 12 ne’e, seidauk konklui prosesu apuramentu.

Tanba totál akta ne’ebé STAE Oé-Cusse rejista atu halo apuramentu hamutuk akta 80 mai hosi sentru votasaun 80 no estasaun votasaun 115.

Notísia relevante: PNTL Oé-Cusse preparadu asegura kampaña no eleisaun parlamentár

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!