DILI, 25 maiu 2023 (TATOLI)–Vise Prezidente Komisaun Nasionál Eleisaun (CNE), Domingos Berreto, hateten durante apuramantu nasionál, CNE valida votu reklamadu hamutuk 66 hosi Aileu, Ainaro, Ataúro, Bobonaro no Covalima hodi atribui votu 38 ba partidu CNRT.
Notísia Relevante: Responsabilidade STAE ramata, CNE kontinua halo verifikasaun ba votu reklamadu sira
“Hosi Aileu, votu reklamasaun ualu (8) ne’ebé votu haat (4) nafatin sai nulu no votu haat (4) sai validu hodi atribui ba Partidu CNRT. Iha Aileu mosu mós deskripansia numérika, maibé konsege detekta tanba eleitór ne’ebé vota tau fali ba laran. Ida-ne’e CNE konsidera nu’udar votu rejeitadu. Hosi Ainaro nian votu reklamadu lima (5) sai validu no lima ne’e atribui ba Partidu CNRT. Hosi Ataúro votu reklamadu ida no sai validu, nune’e atribui ba CNRT,” nia dehan iha konferénsia imprensa Colmera, kinta ne’e.
Hosi Bobanaro votu reklamadu iha 43 maibé bainhira valida votu nulu sai neen (6), votu branco sai tolu (3) no validu 34, hodi atribui ba PD tolu, KHUNTO rua, FRETILIN lima no CNRT 24.
Hosi Covalima, votu reklamadu hamutuk sia (9), votu nulu sai rua (2) no validu hitu (7) hodi atribui ba PD votu ida (1), FRETILIN rua (2) no CNRT haat (4).
Hosi Baucau nian iha mós deskripansia numérika, iha buletin votu tolu (3) mak sai votu abandonadu, tanba Eleitór ne’ebe vota la tau buletin votu ne’ebe nia vota ba urna-laran.
CNE hala’o verifikasaun votu reklamadu iha apuramentu nasionál, tanba CNE hala’o nia funsaun, papel no kompeténsia haktuir atribuisaun iha artigu 65, alinea h, Konstituisaun Repúblika Demokrátika Timor-Leste (RDTL) no artigu 8, Lei Nú. 5/2006, 28 dezembru, ho redasaun alterasaun datoluk iha Lei Nú. 16/2021, 28 jullu, Lei Nú. 6/2006, 28 Dezembru, ho alterasaun dahaat ba Lei Nú. 9/2017, 5 maiu, ho konjugasaun iha Decreto do Governo Nú. 21/2017, 10 fevereiru, kona-ba Prosedimentu votasaun kontazen no apuramentu ba rezultadu eleisaun parlamentár.
CNE hahú halo Apuramentu Nasional iha Loron 24 fulan Maiu 2023, hodi prosede akta Apuramentu Munisipál 13 no RAEOA, Akta sentru votasaun hamutuk 1,472 ne’e inklui sentru votasaun 12 iha diáspora, falta akta hosi Reinu Unidu Irlanda do Norte no Portugál votu reklamadu ne’ebe iha hamutuk 515 no CNE kontinua halo verifikasuan to’o sesta (26 maiu 2023) aban.
Jornalista : Osória Marques
EDitór : Cancio Ximenes
