DILI, 29 maiu 2023 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS) hamutuk ho Komisaun Funsaun Públika (CFP, sigla portugés), segunda ne’e, lansa atividade komemorasaun loron nasionál Funsaun Públika.
Prezidente CFP, Faustino Cardoso, hateten, lansamentu atividade ohin hanesan preparasaun ba komemorasaun loron nasionál Funsaun Públika ne’ebé sei monu iha loron 15 jullu 2023 ho tema ‘A Influencia das Redes Sociais no Desempemho dos Servisdores Publicos’.
“Komemorasaun loron ne’e hanesan kultura ida ba ita atu halo reflesaun nu’udar servidór ba nasaun, saida mak ita hala’o ona no presiza halo tan, nune’e ita bele serví povu di’ak liután ho responsabilidade no kualidade,” Faustino Cardoso hato’o iha salaun Ministériu Finansa (MF), Aitarak-Laran, Dili.
Iha fatin hanesan, Ministériu Asuntu Parlamentár no Komunikasaun Sosiál, Francisco Martins da Costa Pereira Jerónimo konsidera tema ne’ebé foti relevante ho situasaun atuál.
“Ita agora tama ona iha mundu dijitál, ne’ebé hanesan mundu ne’ebé ita presiza adapta ba dijitál. Tanba ne’e ha’u husu kargu xefia haree kontrola didi’ak situasaun sira ne’e, iha tempu servisu ita tenke ezerse ita-nia funsaun nu’udar profesionál hanesan servidór Estadu, atu serví ita-nia rai, la’ós tempu servisu ita halimar fali status ka rede sosiál,” nia akresenta.
Iha biban ne’e, lori Primeiru-Ministru, Taur Matan Ruak nia naran, felisita funsionáriu no membru VIII Governu tomak ne’ebé serví ona Estadu.
“Ita-nia Primeiru-Ministru hato’o parabéns ba funsionáriu hotu, liu-liu membru VIII Governu ne’ebé durante mandatu tinan-lima hala’o ona servisu maski hasoru difikuldade barak maibé ho esforsu tomak konsege rezolve maski seidauk hotu,” governante ne’e apresia.
Lansa atividade 13
Iha fatin hanesan, Prezidente Komisaun Organizadora ba loron nasionál Funsaun Públika, Paulino Quintas, informa, komemorasaun loron ne’e sei iha atividade 13.
“Objetivu prinsipál komemorasaun loron nasionál Funsaun Públika ba tinan ida-ne’e mak hametin konsolidasaun entre funsionáriu sira, haforsa espíritu sakrifísiu hasoru dezafiu barak, krítika oin-oin, maibé nu’udar funsionáriu públiku prontu simu krítika ho meiu mínimu ita kontinua serví ita-nia nasaun,” nia tenik.
Notísia relevante : CFP husu PN altera lei reforma regula funsionáriu idade avansada
Paulino Quintas dehan maski durante ne’e funsionáriu sira haosru dezafiu no difikuldade oin-oin maibé nafatin hatudu resposabilidade, disiplina, lealidade, onestidade, no nasionalidade nu’udar servidór Estadu hodi serví rai ida-ne’e ho di’ak.
“Ita-nia atividade 13 ne’ebé sei hala’o molok komemora loron nasionál Funsaun Públika mak hanesan hahú ohin ho lansamentu doasaun ran, ba oin sei kontinua atividade desportiva hanesan futsal, basketbol, kompetisaun orál, semináriu, limpeza jerál, vizita prizaun sira no seluk tan,” nia relata.
Jornalista : Arminda Fonseca
Editora : Julia Chatarina
