VIQUEQUE, 29 maiu 2023 (TATOLI)—Polísia Nasionál Timor-Leste (PNTL) Viqueque hahú halo ona prosesu identifikasaun ba akontesimentu ahi-han uma ida iha aldeia Bahauai, suku Uma-Uain Leten, postu administrativu Viqueque Vila, munisípiu Viqueque, iha loron domingu (28/05).
“Ami tau importánsia tanba hetan keixa hosi vítima. Ami konsidera no halo prosesu identifikasaun. Tanba ne’e, parte vítima halo nafatin kolaborasaun ho parte seguransa atu prosesu identifikasaun la’o ho di’ak, vítima sira tenke deskobre ema ruma, nune’e labele difikulta ba prosesu ida-ne’e. Ami sei la husik kazu sira hanesan ne’e, PNTL sei ba hakbesik-an ba vítima sira tanba seidauk identifika ema ruma ba kazu ne’e,” Komandante PNTL Viqueque, Superintendente, Sebastião Alves Quintão, informa iha ninia knaar fatin, Beskem, segunda ne’e.
Aleinde ne’e, PNTL ho apoiu hosi FALINTIL-Forsa Defeza Timor-Leste (F-FDTL) kontinua destaka iha parte Uatulari hodi fó seguransa ba populasaun hodi bele la’o livre no hakmatek.
Notísia relevante : Ahi han uma ida iha Fomento I tanba sirkuitu elétriku
Iha fatin ketak, Reprezentante família vítima, Vasco Almeida, haktuir, iha ema deskoñesidu sunu uluk uma iha loron 23 maiu, maibé ahi la han tanba komunidade barak mak ajuda hamate ahi.
“Nune’e akontese tan iha domingu madrugada maizumenus tuku 02:25, ema mai sunu, ami la konsege salva tanba akontese iha kalan boot. Sasán sira iha uma laran ahi han hotu la salva buat ruma,” nia akresenta.
Daudaun vítima sira hela provizóriu hamutuk ho família tanba sira-nia uma-du’ut ahi-han moos hotu.
“Akontesementu ida-ne’e ami liga ona ba polítika, ita lalika dun tan ba buat seluk. Ho ida-ne’e ami husu ba na’i-ulun sira atu kria seguransa metin ba ami povu sira tanba na’i-ulun sira maka aproveita hetan kadeira, maibé ami povu maka sai vítima hela de’it ba polítika,” nia hato’o.
Iha biban ne’e, Xefe suku Uma-Uain Leten, Martinho Soares Gusmão, fó apoiu tomak ba prosesu identifikasaun nune’e bele deskobre suspeitu.
“Ema ne’e sé ita seidauk hatene loos, ne’ebé prosesu identifikasaun mak foin ita bele hatene. Agora ne’e seidauk bele hatene suspeitu loos tanba horiseik parte investigasaun PNTL ba fatin akontesimentu ahi-han uma hodi halo prosesu identifikasaun ba vítima inklui viziñu sira,” nia tenik.
Jornalista : Vitorino Lopes da Costa
Editora : Julia Chatarina
