DILI, 09 maiu 2023 (TATOLI) – Ahi han uma ida iha aldeia Fomento I, suku Comoro, postu administrativu Dom Aleixo tanba sirkuitu elétriku. Akontesimentu ne’e iha tuku 09:00 dadeer, ohin. Inséndiu ne’e rezulta sala ida ho sasán hanesan kadeira, meza, armáriu inklui televizaun la konsege salva.
Alberto António Silva hanesan uma-na’in relata katak durante ne’e sira iha problema ho liña eletrisidade, tanba kontadór ne’ebé monta iha sira-nia uma ne’e la funsiona ho di’ak.
“Liña eletrisidade ne’ebé foti hosi ahi-inan tama-mai uma ne’e la liu hosi kontadór tanba aat ona. Ne’e duni, korrente hosi ahi-inan ne’e fahe direta kedan ba uma-laran tomak. Parese ho kauza sira ne’e maka hamosu inséndiu hodi rezulta sirkuitu ne’e”, nia hatete.
Alberto Silva afirma inséndiu ne’e mosu tanba ahi lakan-mate no to’o minutu ida maka komesa suar maka’as no ikus mai sala vizita ne’ebé instala kontadór la funsiona ne’e ahi-han.
Alberto haktuir ho problema eletrisidade ne’e, nia informa ona ba EDTL no ekipa sira tun direita haree ona kontadór, maibé larezolve.
“Ha’u ladún hatene didi’ak kauza hosi ahi-han ne’e, maibé ha’u deskonfia ne’e mai hosi eletrisidade, tanba durante ne’e ami-nia kontadór la di’ak”, nia afirma.
Segundu Komandante Autoridade Protesaun Sivíl Munisipiu Dili, Anibal Paulo Maia, hatete inséndiu iha uma Fomentu I ne’e mai hosi sirkuitu eletrisidade iha sala ne’ebé instala kontadór ba.
Nia realsa insédiu ne’e la konsege da’et to’o uma tomak inklui uma viziñu nian tanba ekipa Protesaun Sivíl to’o imediata hodi hamate kedan ahi nia lakan.
“Inséndiu ne’e la rezulta ema ruma hetan kanek, maibé sasán sira iha fatin ahi han ne’e mak la konsege salva. Fatin sira seluk iha uma refere di’ak hela”, nia afirma.
Jornalista: Tomé Amado
Editor: Maria Auxiliadora
