DILI, 29 maiu 2023 (TATOLI)—Prezidente Komisaun Funsaun Públika (KFP), Faustino Cardoso, espera Governu foun bele inisia fali no tau prioridade ba matéria idade serbisu efetivu funsaun públika no ajente administrasaun públika tanba mandatu Governu atuál atu ramata ona.
“Momentu ne’ebá lei ne’e fó loron-100 resin maibé haree hosi mandatu VIII Governu kuaze ramata ona, nune’e sei difísil. Ita hein IX Governu mai atu kontinua, maibé atu kontinua presiza hahú fali hosi foun tanba tuir mekanizmu legál ne’ebé mak iha, bainhira Governu ida mandatu hotu mak proposta ne’e seidauk konsege halo apresiasaun no aprovasaun, mak sei sai kaduka no tenke hahú fali prosesu foun,” Prezidente KFP, Faustino Cardoso, hateten, iha Ministériu Finansa, Aitarak-laran, segunda ne’e.
Notísia relevante : Komisaun A ho Governu hahú diskute lejislativa limitasaun idade reforma
Antes ne’e, iha dezembru 2022, Parlamentu Nasionál (PN) aprova ona proposta-lei númeru 43/V (4a) kona-ba autorizasaun lejizlativa iha matéria fixasaun limite idade relasaun serbisu ba funsionáriu públiku no ajente administrasaun públika, iha finál globál no submete ona ba Prezidente Repúblika hodi hein promulgasaun.
Tuir Prezidente KFP, Governu iha tempu balun atu hasai fali lei kódigu reforma nian hafoin promulgasaun, maibé la konsege.
“Loloos ne’e iha diskusaun ona no Komisaun Funsaun Públika durante ne’e alerta nafatin ba Governu atu aselera ho definisaun serbisu efetivu iha funsaun públika, hodi nune’e ema sira ne’ebé ho idade 60 ba leten bele ona goza sira-nia pensaun no fó fali fatin ka espasu ba sidadaun sira ne’ebé prinexe idade atu tama serbisu. Governu daudaun mandatu hela de’it loron-21, ne’ebé ita la hatene proposta dekretu-lei kona-ba reforma nian ne’e VIII Governu sei bele halo ka lae, tanba desde fevereiru liubá Parlamentu Nasionál aprova ona lei lejislativa balun ba Governu atubele define téknikamente idade reforma ne’e,” akresenta.
Notísia relevante : Lejislativa limitasaun idade reforma hein promulgasaun
Tuir Prezidente KFP, funsionáriu ho idade reformadu ka 60 ba leten ne’e iha númeru maioria hosi edukasaun.
“Maibé iha pensamentu inisiál hanesan ita hotu akompaña idade reformadu ne’e sei fó fleksibilidade ba profisaun sira ne’ebé Estadu haree importante atu asegura ninia kontinuidade, liu-liu ba profisionalizmu sira hanesan edukasaun no saúde,” nia tenik.
Faustino Cardoso haktuir, bazeia ba proposta ne’e, sei fó espasu tinan-lima ba idade reformadu sira, liu-liu ba sira ne’ebé rejime espesiál iha área saúde no edukasaun.
“Ida-ne’e tuir proposta uluk nian keta Governu foun mai nian seidauk hatene,” nia adianta.
To’o ohin loron KFP rejista funsionáriu públiku no ajente administrasaun públika hamutuk 36.000 resin, ne’ebé númeru ne’e la inklui sira ne’ebé durante ne’e nu’udar kazuál, asesór nasionál no internasionál.
“Bainhira ita inklui sira ne’e hotu ita bele dehan númeru funsionáriu bele to’o 50.000 resin. Hosi númeru ne’e, balun tama ona idade reforma,” Prezidente KFP relata.
Tuir dadus, funsionáriu públiku ho idade 60 ba leten hamutuk 3.441, ne’ebé hosi númeru ne’e, 60% nu’udar manorin sira hosi Ministériu Edukasaun Juventude no Desportu (MEJD).
Jornalista : Arminda Fonseca
Editora : Julia Chatarina
