Fitun Naroman aprezenta teatru harame loron mundiál labarik iha Oé-Cusse

OÉ-CUSSE 01 juñu 2023 (TATOLI) – Grupu Fitun Naroman, lideradu Baptista Lelan ‘Lafu-Umeke’, kinta ne’e aprezenta teatru ho títulu proteje labarik hosi família asesu ba edukasaun hodi harame selebrasaun loron mundiál labarik iha Rejiaun Administrativa Espesiál Oé-Cusse Ambeno (RAEOA).

Notísia relevante: INDDICA preokupa labarik barak hosi Oé-Cusse fa’an sasán iha Dili

Koordenadór Grupu Teatru Fitun Naroman, Baptista Lelan, informa, selebrasaun loron mundiál labarik iha mundu akontese iha loron 01 juñu kada kada tinan, nune’e iha Oé-Cusse mós selebra, hodi envolve estudante barak mai hosi sub-rejiaun haat; Oésilo, Pássabe, Nitibe no Pante Makasar.

“Enatun, ida-ne’e oportunidade mai ami-nia grupu, atu oinsá aprezenta teatru ida, liga ba edukasaun, tanba ita hatene Oé-Cusse, maioria labarik barak ladún asesu edukasaun maibé hili liu ba buka moris liuhosi fa’an sasán,” Baptista Lelan hateten.

Tuir nia, labarik ladún asesu ba edukasaun tanba menus koñesimentu, inan-aman no família mak autór prinsipál, atu oinsá proteje labarik nia moris, enkoraja nia, atu labele envolve iha serbisu infatíl, liuliu serbisu fíziku.

“Entaun ohin ne’e, hanesan fanun ba inan-aman sira, ami aprezenta ami-nia teatru ho títulu, labarik iha direitu asesu ba edukasaun no direitu atu halimár, nu’udar inan-aman akompaña de’it no enkoraja sira, tanba labarik mak futuru nasaun Timor-Leste,” nia fó hanoin.

Nia esplika, teatru ne’e liga direita ba kondisaun ne’ebé mak durante ne’e akontese iha Oé-Cusse, ho obejtivu anima estudante liuliu alin kiik-oan sira, nu’udar edukasaun sívika ida, atu oinsá luta asesu ba edukasaun, tanba ita hahú atu luta sempre akontese tentasaun no impedimentu.

Notísia relevante: Loron mundiál labarik, INDDICA husu entidade Oé-Cusse proteje labarik nia moris

Nia hatutan, tanba dalaruma akontese tentasaun kulturál, labarik hakarak eskola, maibé inan-aman lakohi, hakarak hola malu tanba belis, parte seluk, dalaruma impaktu ekonomia la sufisiente atu dudu oan ba eskola, seluk fali hakarak ajuda de’it inan-aman.

“Tán ne’e objetivu hosi teatru ne’e, atu atrai no enkoraja alin kiik-oan sira, bele hamnasa maibé ho hanoin katak iha teatru ne’e iha nia sentidu motivasaun, katak dezde sei idade ki’ik luta asesu edukasaun primeiru xave mak inan-aman,  objetivu seluk fali, ohin mós fó hanoin ba inan-aman no profesór sira, tanba protesaun labarik ne’e  ema hotu nian, tanba labarik mak futuru nasaun,” nia katak.

Nia esplika, teatru ohin aprezenta, iha uma-kain rua, família ida hakarak eskola maske kondisaun moris laiha garantidu, maibé família ida seluk lakohi  nia ona sira eskola, tanba depende ba rikusoin sira hanesan animál, nu’udar meiu ida hakarak ajuda inan-aman.

Nia fó prioridade liu ba rikosoin ne’ebé iha, dehan eskola mós hanesan de’it, ida-ne’e Grupu Fitun Naroman aprezenta fas parte saida mak akontese iha Oé-Cusse.

“Maibé teatru ne’e nia finalidade ikus nian, família lakohi fó eskola nia oan sira, konkorda katak, moris ne’e presiza edukasaun, maske riku no ki’ak maibé labarik hanesan futuru tenke fó eskola, tanba bainhira depende ba rikosoin moris ne’e sei laiha mudansa, kuandu eskola sai matenek, laiha ema ida hasai hosi ita to’o mate, ida-ne’e mak teatru ikus nia solusaun,” nia katak.

Iha ámbitu loron mundiál ne’e, Autoridade liuhosi servisu Promosaun Unidade Promosaun Igualdade Jéneru no Inkluzaun Sosiál, prepara jogu tradisionál hanesan, halai karon, tata berlindus no fasilita dezeñu ba labarik sira.

Partisipa iha selebrasaun loron mundiál labarik iha Oé-Cusse, mai hosi ensinu pré-eskolár no ensinu báziku primeiru no segundu siklu sira hosi sub-rejiaun haat; Oésilo, Pássabe, Nítibe no Pante Makasar.

Nune’e mós partisipa mós hosi parsériu rede referál rejionál nasionál no ajénsia internasionál sira, loke espozisaun hodi fasilita dezeñu gratuita ba labarik sira, hanesan UNICEF, INDDICA, Plan International no MSSI.

Jornalista   : Abílio Elo Nini

Editór           : Evaristo Soares Martins